Actualidade
Novas e Axenda Bota un ollo á actividade do GEA
De-illas-e-sereas-libros

Cineuropa acolle a presentación de De illas e sereas

O terceiro volume da serie Para unha historia do cinema en lingua galega darase a coñecer nun acto vía streaming o 16 de novembro ás 18 horas

11/11/2020

Margarita Ledo, Marta Pérez Pereiro e Fernando Redondo presentarán de De illas e sereas. Para unha historia do cinema en lingua galega [3] ao abeiro do #Cineuropa34. O acto emitirase en liña ás 18 da tarde do luns 16 e enmárcase nunha serie de actividades paralelas do festival, como a conversa con Alfonso Zarauza o xoves 12 ou a sesión de curtas galegas o venres 13.

O libro, editado polo GEA (Grupo de Estudos Audiovisuais) e a editorial Galaxia, transita os filmes galegos estreados no último ano e algúns que están aínda por estrear, á vez que rescata outras pezas fóra de circuíto convencional, nunha singradura polas illas fílmicas e as sereas que as habitan que da pé a unha construción crítica da historia cinematográfica galega «á marxe de servidumes académicas e desde a crítica aos modos obsoletos de pensar nas películas».

Baixo a coordinación de Margarita Ledo, que tamén recibirá o Premio Cineuropa 2020,  escriben outros membros do GEA como Fernando Redondo Neira, Cibrán Tenreiro Uzal,  Antía López Gómez, José Luis Castro de Paz, Marta Pérez Pereiro e convidados como Alberte Pagán ou Pablo Súarez-Mansilla. A través dos seus textos viáxase do cinema máis realista (Laxe)  ao máis onírico (Patiño), do experimental e de reciclaxe (Domínguez, Chirro, Díaz-Noriega,Lores) ao cine de mulleres (do Teixeiro, Franco, Pagán, Ledo) e arríbase mesmo aos filmes contemporáneos da diáspora (Domínguez Serén), nunha selección heteroxénea e viva que «esculca nas marxes, nos intersticios, nas fendas secasí no que se nos anuncia para datas vindeiras».

A presentación farase a porta pechada por mor das restricións actuais mais pode seguirse por streaming a través da canle de Compostela Cultura este luns 16 ás 18 horas.

O terceiro dunha serie

A serie Para unha historia do cinema en lingua galega está formada polos volumes Marcas na paisaxe, A foresta e as árbores e De illas e sereas, todos eles publicados en colaboración coa Editorial Galaxia entre os anos 2018 e 2020 no marco do proxecto de I+D+i «EU-VOS. Patrimonio Cultural Inmaterial. Para un programa europeo de subtitulado en linguas non hexemónicas» (CSO2016-76017-R), financiado por FEDER-Fondo Europeo de Desenvolvemento Rexional, Ministerio de Ciencia Innovación e Universidades – Axencia Estatal de Investigación. Este terceiro libro conta ademais coa financiación da Xunta de Galicia a través da súa convocatoria de axudas á consolidación e estruturación de unidades de investigación competitivas, da que é beneficiaria o GEA.

MÁIS NOVAS
O GEA recibe a Mención Honorífica da USC pola súa traxectoria a prol da igualdade de xénero.
O acto de entrega celebrarase o 9 de marzo ás 12.00 h no Paraninfo da USC
26/02/2021

A Oficina de Igualdade de Xénero da USC outorga ao  Grupo de Estudos Audiovisuais a Mención Honorífica en recoñecemento a unha consolidada traxectoria de investigación e actividades formativas con perpectiva de xénero. Entre as iniciativas e accións promovidas polo GEA e valoradas para a concesión desta mención, a Universidade pon énfase no desenvolvemento do CO(M)XÉNERO-Seminario […]

Seguir lendo
Publícase o Libro de Homenaxes da Asociación Española de Investigación da Comunicación (AE-IC)
Cos textos de Margarita Ledo, Néstor García Canclini e Ramón Zallo
09/02/2021

A Asociación Española de Investigación de la Comunicación (AE-IC) acaba de publicar en aberto o libro de homenaxes da última edición do seu congreso internacional, que recoñeceu a traxectoria de Margarita Ledo Andión, Néstor García Canclini e Ramón Zallo. O volume inclúe as laudatorias que lles dedicaron Emili Prado, Miquel de Moragas e Mª Trinidad […]

Seguir lendo
Margarita Ledo Andión tomará parte nas conferencias maxistrais do Museo Reina Sofía
Será o 26 de febreiro ás 18.00 horas
09/02/2021

A Cátedra Juan Antonio Ramírez do Museo Reina Sofía convida á investigadora, cineasta, poeta e escritora Margarita Ledo Andión ao seu programa de conferencias maxistrais. Baixo o título “Exilio. Feminismo. Ensaio fílmico: o corpo como vestixio“,  Ledo Andión propón unha reflexión en torno ao corpo como punto de chegada logo de percorrer un fío invisible que […]

Seguir lendo
© 2021 Estudos Audiovisuais