Actualidade
Novas e Axenda Bota un ollo á actividade do GEA

Abertas as inscricións para a terceira edición do CO(M)XÉNERO

O seminario pon o foco nos videoxogos para analizar o sexismo, violencias e desigualdades do sector

08/10/2019

A terceira edición do CO(M)XÉNERO, Seminario Permanente de Comunicación e Xénero decorrerá nos días 18 e 19 de novembro na Facultade de Ciencias da Comunicación, organizado polo Grupo de Estudos Audiovisuais (GEA) e a Oficina de Igualdade de Xénero da USC. Nesta ocasión, as xornadas poñen o foco nos videoxogos, un sector tradicionalmente asociado ao ocio masculino no que as mulleres veñen reclamando, cada vez máis, a súa voz propia como creadoras, xogadoras e comunicadoras.

Coordinado pola directora do GEA, a catedrática Margarita Ledo Andión, e a docente e investigadora da USC, Marta Pérez Pereiro, o seminario está dirixido a estudantes de comunicación, investigadoras e investigadores en formación, profesionais e, en xeral, a todas as persoas interesadas en abordar os medios e as industrias culturais e creativas dende unha lectura crítica. A participación no CO(M)XÉNERO pode ser recoñecida como actividade formativa para o estudantado do programa de doutoramento da USC «Comunicación e Información Contemporáneas»

A inscrición é de balde e está aberta até o 15 de novembro a través do formulario dispoñible na web do GEA.

«Cibersexismo. Violencia e Videogoxogos» é o lema que delimita os tópicos deste terceiro CO(M)XÉNERO. Así pois, o seminario busca revelar as desigualdades e os estereotipos de xénero dun sector que, polo seu crecemento e polas propias posibilidades que ofrece como medio, adquire a día de hoxe unha relevancia especial como espazo creador de discursos e de universos posibles.

As xornadas contarán coa participación docentes, creadoras, deseñadoras e xogadoras que analizarán, dende a súa experiencia, os escenarios de violencia e discriminación que sofren as mulleres e como podemos facerlles fronte dende a educación e a comunicación.

O programa inclúe conferencias, sesións de proxeccións e debate, obradoiros para achegármonos, cunha óptica inclusiva, ao desenvolvemento de videoxogos e mais un torneo de exhibición de eSports.

Esta terceira edición do CO(M)XÉNERO está financiada con fondos do Pacto de Estado contra a Violencia de Xénero (Ministerio da Presidencia, Relacións coas Cortes e Igualdade) e da Xunta de Galicia a través da convocatoria 2017 de axudas para a consolidación e estruturación de unidades de investigación competitivas, da que é beneficiario o GEA.

MÁIS NOVAS
Nace o MOCA, o primeiro museo virtual adicado ao cinema autobiográfico
23/01/2020

Da colaboración entre La Cinematográfica, unha organización viguesa para a xestión cultural do cinema, e a empresa Café Candelas, nace o MOCA, o primeiro Museo Online de Cine Autobiográfico. O seu obxectivo é “por en valor o cinema como medio para contar historias persoais e o celuloide como soporte atemporal no que gardar as lembranzas […]

Seguir lendo
Nova publicación sobre a representación cinematográfica das emigrantes galegas na Arxentina
22/01/2020

Nos seus escritos sobre cinema, Jean Epstein explicaba poeticamente que todo film contén unha “traxedia en suspenso” que non está explícita na narrativa. Esta idea cinemática guía a análise que Marta Pérez Pereiro e Silvia Roca Baamonde realizan dos filmes Cándida (1939) e Cándida millonaria (1941), dúas das tres comedias sobre unha criada galega en […]

Seguir lendo
O «Filma Afro 2020» abre o prazo de solicitudes de ‘Bolsas Ibermedia’ e ‘Matrículas Internacionais’
Admítense propostas até o 15 de febreiro
21/01/2020

«Filma Afro Cartagena», o Laboratorio Internacional en Desenvolvemento de Proyectos documentais, é un punto de encontro no que se dan cita realizadoras/es de Iberoamérica e o mundo para traballar xunto a grandes profesionais da cinematografía internacional no perfeccionamento de proxectos documentais cuxo tema central estea relacionado coa representación da cultura Afro. A organización vén de abrir […]

Seguir lendo
INVESTIGACIÓN / MARCO VINCULADO
CO(M)XÉNERO Seminario Permanente de Comunicación e xénero
Data de inicio: 12/11/2018Data de fin: 31/12/2020I.P.: Margarita Ledo AndiónInvestigadores participantes: Margarita Ledo Andión Marta Pérez Pereiro Silvia Roca Baamonde , Carla Cerqueira; Ana Jorge
Foco permanente de discusión e formación sobre o papel dos medios na vertebración da sociedade, con especial atención á visibilización informativa e cinematográfica da(s) identidade(s) de xénero.
Seguir lendo
© 2020 Estudos Audiovisuais