As pasaxes múltiples: apuntamentos sobre as relacións de investigación da Galiza co espazo Iberoamericano

A intersección entre os dous ámbitos que esta obra colectiva denomina “Mundo Iberoamericano”, o ámbito lusófono máis o hispanófono, foi un dos albos que orientou o desenvolvemento de liñas significativas e programas de investigación no marco da Universidade de Santiago de Compostela, USC, en colaboración estreita coa Asociación Galega de Investigadoras e Investigadores da Comunicación, AGACOM, que, fundada en 2001, tiven a honra de presidir durante os seus primeiros 15 anos. A idea que nos animou dende o comezo devalou do ideoloxema “un só mundo, espazos múltiples” canda o recoñecemento do que supuxo o NOMIC para a construción dun outro modo de pensar a comunicación, que se concretara  naquela obra de referencia “Un solo mundo, voces múltiples”, un texto seminal para a xeración dos oitenta. Así, e denantes adentrarme no que significou para a Galiza a escolla do espazo lusófono como escenario comunicacional e, no concreto, os 20 anos de relación de investigación con Brasil, querería partillar algúns momentos de interese e, asemade, a débeda da nosa toma de posición, teórica e metodolóxica, coa actitude e achegas en aberto dos Estudos Culturais e as súas variacións.