Actualidade
Novas e Axenda Bota un ollo á actividade do GEA
Intervención de Margarita Ledo na homenaxe da AE-IC

Margarita Ledo reivindica as linguas e o cinema na homenaxe que lle otorgou a AE-IC

28/10/2020

Este mércores 28 de outubro a catedrática de Comunicación Audiovisual e Publicidade e coordinadora do Grupo de Estudos Audiovisuais na USC, Margarita Ledo Andión, recibiu en València a homenaxe a toda unha vida de investigación en comunicación, outorgada pola Asociación Española de Investigación da Comunicación no VII Congreso Internacional da AE-IC. O acto celebrouse no paraninfo de La Nau da Universitat de València e puido seguirse en directo a través de Internet. Participaron no mesmo os tamén homenaxeados Ramón Zallo (UPV/EHU) e Néstor García Canclini (Universitat Autónoma Metropolitana de México) e as profesoras e profesores MªTrinidad García Leiva (UC3M), Miquel de Moragas (UAB) e Emili Prado (UAB), que realizaron as laudatios de presentación a cada unha das homenaxeadas.

Emili Prado, compañeiro de Margarita Ledo Andión por moitos anos na profesión xornalística e na academia, trazou «desde a emotividade» un retrato co que iluminou as diferentes caras «dunha persoa poliédrica como Margarita»: como creadora na literatura e no cinema, como activista comprometida xa desde os anos 70 do pasado século XX coa diversidade, coa reivindicación de políticas de comunicación democráticas e coa defensa da lingua galega como vehículo de comunicación científica, e como «unha teórica con mans», comprometida tamén cos seus obxectos de investigación «sen perder nunca a capacidade crítica».

A consolidación da Facultade de Ciencias da Comunicación da USC «como un referente de boa práctica a nivel nacional e con proxección internacional», o impulso decisivo ás relacións entre a academia galega e portuguesa, así como entre a comunidade lusófona con España e Iberoamérica, son algúns dos fitos que o profesor Emili Prado salientou na súa presentación, ademais das súas achegas imprescindibles á investigación nos usos e prácticas da imaxe, especialmente na fotografía, o fotoxornalismo e o documental.

Pola súa parte, Margarita Ledo Andión comezou a súa intervención subliñando a importancia de deixar de lado a competitividade en favor da solidariedade científica. Tomando como exemplo a disputa pola descuberta do Polo Sur que Stefan Zweig relata no seu libro Momentos estelares da humanidade, Ledo Andión afirmou que, tamén ao falar da Comunicación, non nos interesa quen chegou primeiro senón «quen nos entregou un legado no que non só se constatan os feitos senón un modelo de construción de coñecemento que se organiza a redor da colaboración» e a consciencia de que «todo o aprendido debe regresar á sociedade. A nós».

Ademais dos agradecementos ao consello científico da AE-IC polo recoñecemento, a catedrática da USC quixo deixar constancia dalgunhas «resonancias xeracionais, de tomas de posición, resonancias académicas e científicas» que marcaron a súa inscrición na asociación e tamén o devir desta. Dende a primeira comisión xestora e a primeira directiva da AE-IC na que participou á primeira semi-plenaria de Xénero no Congreso de Bilbao en 2014, agora xa sección específica de nova creación, ou a reconfiguración das relacións con América Latina e co espazo lusófono.

Ao falar da súa traxectoria investigadora, Margarita Ledo Andión puxo énfase «nas linguas non hexemónicas e o cinema», nos proxectos galegos, estatais e internacionais que levaron a recoñecer a «opción irrenunciable e insustituible no actual mapa cultural europeo» de contar con películas tanto en versión orixinal como en versión orixinal subtitulada nas linguas propias das cinematografías pequenas, os cinemas of small nations. Os resultados do proxecto  EU-VOS, que se darán a coñecer precisamente no congreso ou a serie de libros Para unha historia do cinema en lingua galega (Marcas na paisaxe, A foresta e as árbores, De illas e sereas), afondan precisamente nesta cuestión.

València VO – Texto completo da intervención de Margarita Ledo Andión en resposta á homenaxe da AE-IC

[Fotografía: VII Congreso Internacional da AE-IC]

MÁIS NOVAS
Seminario “Película sen facer. Elementos dun cinema latente”
Os días 1 e 2 de xuño, no (S8) Mostra de Cinema Periférico da Coruña.
22/05/2024

O seminario, , parte do (S8) Mostra de Cinema Periférico da Coruña, dirixido a artistas, comisarios, cineastas, programadores, investigadores, arquiveiros e estudantes, de acceso libre, xira ao redor das películas inacabadas ou cuxa finalización foi truncada por motivos políticos, financeiros ou persoais, que nos conducirán por territorios como Irán, Marrocos, Corea do Sur ou España. […]

Seguir lendo
Aberto o prazo de inscrición para o simposio `Malestares na cultura espec(tac)ular: perspectivas críticas desde a psicanálise´
A actividade, organizada polo GEA, terá lugar os vindeiros 12 e 13 de xuño na Facultade de Cc. da Comunicación
21/05/2024

Baixo o título “Malestares na cultura espec(tac)ular: perspectivas críticas desde a psicanálise”, o Grupo de Estudos Audiovisuais (GEA) organiza os días 12 e 13 de xuño un simposio para abordar as crebas das subxectividades contemporáneas desde un enfoque interdisciplinar que, a partir da constelación común do campo psicanalítico, integra a análise audiovisual, a crítica filosófica e a […]

Seguir lendo
Aberto o prazo de inscrición para Novas olladas á costa galega (2ª ed.)
Este obradoiro de fotografía documental co Colectivo Ollo terá lugar os vindeiros 6 e 7 de xullo en Noia
15/05/2024

Os vindeiros 6 e 7 de xullo na Sociedade Liceo de Noia (Noia) e baixo a dirección de Mª Soliña Barreiro González e Jennifer Novoa Domínguez, terá lugar a 2ª edición deste obradoiro de fotografía documental organizado polo Grupo de Estudos Audiovisuais e o colectivo fotográfico Ollo. Constará de 16 horas lectivas cun límite de asistencia de 25 persoas. […]

Seguir lendo
© 2024 Estudos Audiovisuais