Actualidade
Novas e Axenda Bota un ollo á actividade do GEA

“A Foresta e as Árbores” preséntase no CGAI cunha proxección de “Trote”

Margarita Ledo, Francisco Castro e José Luis Castro de Paz introducirán esta obra colectiva que explora o cinema galego máis actual

10/09/2019

O Centro Galego de Artes da Imaxe acolle o venres 20 de setembro ás 20:30 horas a presentación do libro A foresta e as árbores. Para unha historia do cinema en lingua galega (2), editado polo Grupo de Estudos Audiovisuais da Universidade de Compostela e Galaxia. A publicación, que continúa a serie iniciada en Marcas na paisaxe, constrúe un itinerario temático ao redor dalgunhas das mostras máis representativas do cinema galego realizado nas últimas décadas do século XXI.

Os catedráticos en Comunicación Audiovisual da USC Margarita Ledo Andión —coordinadora do volume— e José Luis Castro de Paz —autor do capítulo «Filmar as pulsións»— serán os encargados de presentar o libro, acompañados do director da Editorial Galaxia, Francisco Castro. No acto proxectarase tamén a película Trote, de Xacio Baño, seleccionada no 2018 no Festival de Locarno e no Festival Internacional de Cine de San Sebastián, entre outros. A entrada é de balde até completar aforo.

Trote

A primeira longametraxe do cineasta lugués forma parte da escolma de filmes cos que A foresta e ás árbores percorre, dende a ollada particular das oito investigadoras e investigadores participantes na publicación, a diversidade de propostas que caracteriza a cinematografía galega máis actual, con «obras de ficción por veces, documentais ou en pasaxe entre un e outro territorio as máis», apunta Margarita ledo no prefacio da obra. «Nelas a experiencia de facer cinema emerxe como vieiro inescusábel para a expresión subxectiva; cada película semella querer atinxir a totalidade dos sentidos, abríndolle as portas á figura que mira, á espectadora, que sente que mira e que se sente mirada pola película; cada filme é un golpe de sorte, ese xogo de azar que un público, cada vez máis atento, demanda».

Outras árbores da foresta

Canda Trote analízanse no volume outros traballos de cineastas que conseguiron tamén levar o cinema en galego ás salas comerciais e aos principais festivais internacionais —Longa Noite, de Eloy Enciso; Matria, de Ávaro Gago; Trinta lumes, de Diana Toucedo ou Dhogs, de Andrés Goteira entre eles— con propostas que recuperan a memoria e a historia non contada —A viaxe de Leslie, de Marcos Nine; Esquece Monelos, de Ángeles Huerta— ou aquelas que apostan por filmar o traballo, o íntimo ou a nós mesmas —Tódalas mulleres que coñezo, de Xiana do Teixeiro e Vikingland, de Xurxo Chirro, entre outros exemplos—.

A publicación de A foresta e as árbores encádrase no proxecto de investigación ‘EUVOS. Patrimonio Cultural Inmaterial. Para un programa europeo de subtitulado en linguas non hexemónicas’, financiado por FEDER —Fondo Europeo de Desenvolvemento Rexional— e o Ministerio de Ciencia, Innovación e Universidades-Axencia Estatal de Investigación.

MÁIS NOVAS
O GEA participa na reunión con Nestor Rego para valorar a situación da Lei do Audiovisual
Profesionais de distintos ámbitos do sector trasladaron as súas posicións ao deputado do BNG
20/06/2022

Este luns 20 de xuño tivo lugar na Facultade de Ciencias da Comunicación da USC un encontro co deputado do BNG, Nestor Rego, para facer un balance do escenario que se formula para o sector coa aprobación da Lei do Audiovisual. Ao encontro asistiron representantes de varias das entidades que forman a Iniciativa polo audiovisual en […]

Seguir lendo
Agapi organiza a xornada “Marco xurídico do sector audiovisual: retos de futuro”
A actividade celebrarase o 1 de xullo no Auditorio 1 do Edificio CINC da Cidade da Cultura
17/06/2022

Agapi (Asociación Galega de Produtoras Independentes) organiza o vindeiro día 1 de xullo unhas xornadas de formación presencial dedicadas a analizar aspectos xurídicos da produción audiovisual. O desenvolvemento da xornada terá lugar no Auditorio 1 do Edificio CINC da Cidade da Cultura de Galicia, en Santiago de Compostela. Baixo o título: Marco xurídico do sector […]

Seguir lendo
A doutoranda do GEA, Sara Calvete, finalista do concurso ‘Three Minute Thesis’ (3MT®)
A final do certame organizado pola EDIUS celebrarase o 27 de xuño na Nave de Vidán
15/06/2022

A USC, a través da súa Escola de Doutoramento Internacional (EDIUS), puxo este ano en marcha a primeira edición do Three Minute Thesis (3MT®), un concurso de comunicación para investigadores e investigadoras de todas as áreas do coñecemento. A doutoranda do GEA, Sara Calvete Lorenzo, é unha das finalistas do certame co vídeo no que […]

Seguir lendo
© 2022 Estudos Audiovisuais