Actualidade
Novas e Axenda Bota un ollo á actividade do GEA

Tres publicacións promovidas por integrantes do GEA preséntanse no OUFF 2019

A sección «Letras de Cine» do festival busca contribuír á difusión do libro de temática audiovisual

27/09/2019

O Ourense Film Festival 2019, que decorre do 27 de setembro ao 5 de outubro, inclúe este ano a presentación de tres publicacións recentes impulsadas por investigadoras e investigadores do Grupo de Estudos Audiovisuais da USC. Na sección «Letras de cine» do festival daranse a coñecer A foresta e as árbores, segundo volume da serie Para unha historia do cinema en lingua galega, obra colectiva que coordina a directora do GEA, Margarita Ledo Andión; Os amorodos de Bergman, de Fernando Redondo Neira; e o segundo número de Volvoreta. Revista de Literatura, Xornalismo e Historia do Cinema, editada pola Fundación Wenceslao Fernández Flórez, que preside José Luis Castro de Paz.

Esta sección, pensada para contribuír á difusión do libro de temática audiovisual, inaugúrase o domingo 29 de setembro, ás 11:00 horas, coa presentación de A foresta e as árbores (Editorial Galaxia, 2019). María Soliña Barreiro González, docente e investigadora da USC e autora do capítulo «Filmar o dó», será a encargada de introducirnos neste itinerario temático e analítico por algunhas das mostras máis representativas do filmes galegos realizados nos primeiros anos do século XXI.

O martes 1 de outubro, tamén ás 11:00 horas, chega a vez para que o catedrático de Comunicación Audiovisual da USC, José Luis Castro de Paz, dea a coñecer o último número da revista Volvoreta, que leva por título «El malvado Carabel (Wenceslao Fernández Flórez, 1931). Humor e crítica social da novela á pantalla».

Finalmente, o profesor e investigador Fernando Redondo Neira presentará o venres 4 de outubro ás 11:00 horas o libro Os amorodos de Bergman (Editorial Galaxia, 2019), obra gañadora do Premio Ramón Piñeiro de Ensaio 2018, convocado polo Centro Ramón Piñeiro e a editorial Galaxia. O ensaio de Redondo Neira parte dun rexistro fílmico das excursións da Sociedade de Amigos do Campo para reflexionar sobre a imaxe en movemento, ofrecendo unha visión do cinema como unha segunda oportunidade da memoria, unha segunda percepción do vivido.

MÁIS NOVAS
‘As linguas e o cinema II’ analiza a relación das pequenas cinematografías europeas co subtitulado
11/12/2019

A Facultade de Ciencias da Comunicación da Universidade de Santiago de Compostela acolle o xoves 12 e venres 13 de decembro o simposio internacional ‘As linguas e o cinema II. Para un programa europeo de subtitulado en linguas non hexemónicas’. Un encontro aberto á comunidade universitaria e a profesionais do sector no que investigadoras e […]

Seguir lendo
Margarita Ledo Andión participa no ciclo de presentacións da estrea de “Longa Noite”
04/12/2019

Esta semana chega ás salas de cinema Longa noite, o novo filme de Eloy Enciso, un retrato da sociedade galega da posguerra construído a partir de textos de Max Aub, Luís Seoane ou Alfonso Sastre. Para celebralo, a sala NUMAX organiza, do 5 ao 12 de decembro, unha serie de coloquios e presentacións nas que […]

Seguir lendo
“O que arde” consegue catro candidaturas aos Premios Goya 2020
Competirá polos galardóns a mellor película, mellor dirección, mellor actriz revelación e mellor fotografía
02/12/2019

A Academia das Artes e as Ciencias Cinematográficas de España vén de anunciar as candidaturas aos Premios Goya 2020, nas que o cinema galego sobresae cos catro nomeamentos para O que arde (Óliver Laxe, 2019) nas categorías de Mellor dirección, Mellor película, Mellor actriz revelación, con Benedicta Sánchez (O Corgo, Lugo), e Mellor fotografía, a […]

Seguir lendo
© 2019 Estudos Audiovisuais