‘Santa liberdade’ e ‘Longa noite’ proxéctanse no Museo Raíña Sofía
Forman parte do ciclo «As re-voltas da memoria», que aborda o cinema tras as dictaduras de España, Chile e Arxentina
O documental Santa Liberdade (Margarita Ledo Andión, 2004) e o filme Longa noite (Eloy Enciso, 2019) poderán verse este mes de setembro no Museo Nacional e Centro de Arte Raíña Sofía, en Madrid, dentro do ciclo «As re-voltas da memoria».
Este ciclo propón, a través do documental e do cinema-ensaio, distintas formas de abordar a memoria en España, Chile e Arxentina, tres países que comparten a experiencia histórica de ter padecido o drama das dictaduras. Unha experiencia traumática, explican na web do Museo, «que impregna as biografías individuais e colectivas expostas ao terror militar, a censura, a represión, a tortura, a desaparición ou o exilio».
Santa Liberdade proxectarase o venres 25 de setembro ás 19 horas e contará coa presentación da súa directora Margarita Ledo Andión. O filme recompón os grandes trazos da historia da guerra civil española e da dictadura, da resistencia antifranquista e antisalazarista de comezos da década de 1960, recollendo unha historia esquecida pero enormemente reveladora —o secuestro do trasatlántico comercial Santa María por parte dun grupo de insurxentes portugueses e españois que ensaian a bordo unha sorte de república libertaria—, feito que discute a tese de que non existiu un antifranquismo activo.
O luns 28 de setembro, tamén ás 19 horas, poderá verse no Raíña Sofía a longametraxe Longa noite, con presentación e coloquio a cargo do seu director, Eloy Enciso, e Misha Bies Golas, actor principal do filme. Ambientada na posguerra española, o filme reconstrúe a paisaxe emocional da represión franquista a partir de cartas, documentos extraídos de arquivos civís e os escritos de españois exiliados como Max Aub, Luis Seoane, Alfonso Sastre e Ramón de Valenzuela, con actores non profesionais, fillos de exiliados e represaliados pola dictadura.
Todas as proxeccións serán no Auditorio do Edificio Sabatini, de balde até completar a capacidade da sala.
«As re-voltas da memoria» propón distintos exercicios para que a memoria non quede atada ao pasado, a lembrar ou denunciar, senón que tamén explore estratos temporais cheos de fendas, bifurcacións e recunchos. Converxen, neste conxunto de ensaios e documentais, miradas atentas á historia e aos dobramentos da memoria: unha memoria inquisitiva e creadora que transcende o formato monumental para incursionar en narrativas fragmentadas, en campos de visión laterais, en microterritorios corporais e afectivos de identidades magoadas que se permiten a dúbida e a estrañeza como parte da reconfiguración do recordo histórico e persoal.
Máis información na páxina do ciclo no Museo Raíña Sofía.
A Oficina de Igualdade de Xénero da USC outorga ao Grupo de Estudos Audiovisuais a Mención Honorífica en recoñecemento a unha consolidada traxectoria de investigación e actividades formativas con perpectiva de xénero. Entre as iniciativas e accións promovidas polo GEA e valoradas para a concesión desta mención, a Universidade pon énfase no desenvolvemento do CO(M)XÉNERO-Seminario […]
A Asociación Española de Investigación de la Comunicación (AE-IC) acaba de publicar en aberto o libro de homenaxes da última edición do seu congreso internacional, que recoñeceu a traxectoria de Margarita Ledo Andión, Néstor García Canclini e Ramón Zallo. O volume inclúe as laudatorias que lles dedicaron Emili Prado, Miquel de Moragas e Mª Trinidad […]
A Cátedra Juan Antonio Ramírez do Museo Reina Sofía convida á investigadora, cineasta, poeta e escritora Margarita Ledo Andión ao seu programa de conferencias maxistrais. Baixo o título “Exilio. Feminismo. Ensaio fílmico: o corpo como vestixio“, Ledo Andión propón unha reflexión en torno ao corpo como punto de chegada logo de percorrer un fío invisible que […]