Actualidade
Novas e Axenda Bota un ollo á actividade do GEA
Caderno COMXÉNERO 1

Publícase o primeiro caderno de comunicación e xénero CO(M)XÉNERO

30/10/2020

Este mes de outubro saíu do prelo o primeiro Caderno de Comunicación e Xénero CO(M)XÉNERO, libro que escolma as achegas das docentes, profesionais e investigadoras que participaron das tres primeiras sesións do seminario. Situadas no pensamento crítico, as autoras que asinan cada un dos capítulos convídannos a reflexionar sobre xornalismo, cinema, videoxogos e medios de comunicación, prestando atención «aos lugares que habitamos, ás propostas que construímos, ás obras onde nos representamos, a un ben público como o da información ou calquera outro artefacto de comunicación para ollarmos cara a cara cada situación, mesmo as que nos vulneran ou nos negan».

Coordinan o volume, editado en colaboración coa editorial Vía Láctea, as integrantes do Grupo de Estudos Audiovisuais Margarita Ledo Andión, Marta Pérez Pereiro e Silvia Roca Baamonde, as tres impulsoras do Seminario Permanente de Comunicación e Xénero que o GEA vén organizando desde o ano 2018 na USC. Ademais, escriben neste primeiro Caderno CO(M)XÉNERO as profesoras Ana Jorge Alonso (Universidad de Málaga), Marta Pérez Pereiro (Universidade de Santiago de Compostela), Ana Catarina Pereira (Universidade da Beira Interior), Elena Oroz (Universidad Carlos III de Madrid), Carla Cerqueira (Universidade Lusófona do Porto) e a especialista en videoxogos e transmedia Dhaunae De Vir.

A escolma responde ao obxectivo de ampliar o debate sobre os temas e motivos que levaron á realización do CO(M)XÉNERO, á vez que se constitúe en artefacto para a memoria destes encontros, dirixidos a estudantes de comunicación, investigadoras e investigadores, profesionais e, en xeral, a todas as persoas interesadas en abordar, dende unha lectura crítica, os medios e as industrias culturais e creativas para construír audiencias e colectividades capaces de analizar, deconstruír e mesmo comezar a reverter as representacíons e estruturas sexistas que presentan.

No proemio do libro, Margarita Ledo Andión subliña precisamente esta necesidade de actuar, de falar, de acceder ao coñecemento de realidades múltiples que nos configuran e a «propostas outras, diferentes, que respecten o corpo, este corpo que, no dicir de Hélène Cixous, é o que nos fai sentir a vida, a morte, amar, pensar».

A publicación deste primeiro Caderno de Comunicación e Xénero CO(M)XÉNERO contou co financiamento da Xunta de Galicia a través das axudas á consolidación e estruturación de unidades de investigación competitivas e con fondos do Pacto de Estado contra a Violencia de Xénero (Ministerio da Presidencia, RElacións coas Cortes e Igualdade).7

 

 

MÁIS NOVAS
O Repertorio da Radio Galega da Emigración incorpórase ao catálogo da FaCom (USC)
Este recolle as actividades radiofónicas realizadas e protagonizadas polos emigrantes galegos fundamentalmente en América e Europa (1930 ata a actualidade).
17/07/2024

O Repertorio da Radio Galega da Emigración está dispoñible para consulta en sala na biblioteca da Facultade de Ciencias da Comunicación da Universidade de Santiago de Compostela. Un catálogo histórico das actividades radiofónicas realizadas e protagonizadas polos emigrantes galegos fundamentalmente en América e Europa, pero tamén noutros destinos menos frecuentes con presenza galega. Cronoloxicamente abrangue desde […]

Seguir lendo
Aberto o prazo para os Premios María Luz Morales
Este certame de ensaio e vídeoensaio está organizado pola Academia galega do Audiovisual
04/07/2024

A oitava edición dos Premios María Luz Morales de Ensaio e Vídeoensaio sobre o Audiovisual está en marcha. Os Premios María Luz Morales de Ensaio e Vídeoensaio sobre o Audiovisual son unha iniciativa que busca impulsar a produción académica relacionada co ámbito audiovisual. E estimularon a produción de 179 traballos de investigación en materia audiovisual desde a súa […]

Seguir lendo
Seminario “Película sen facer. Elementos dun cinema latente”
Os días 1 e 2 de xuño, no (S8) Mostra de Cinema Periférico da Coruña.
22/05/2024

O seminario, , parte do (S8) Mostra de Cinema Periférico da Coruña, dirixido a artistas, comisarios, cineastas, programadores, investigadores, arquiveiros e estudantes, de acceso libre, xira ao redor das películas inacabadas ou cuxa finalización foi truncada por motivos políticos, financeiros ou persoais, que nos conducirán por territorios como Irán, Marrocos, Corea do Sur ou España. […]

Seguir lendo
© 2024 Estudos Audiovisuais