Actualidade
Novas e Axenda Bota un ollo á actividade do GEA

“O que arde”, de Óliver Laxe, premio do xurado en Cannes

O primeiro filme en versión orixinal galega gaña "Un certain regard"

27/05/2019

O pasado martes, na súa estrea na sala Debussy dentro da programación do Festival de Cannes, o filme O que arde de Óliver Laxe arrincaba a ovación do público francés. Acompañado por Amador e Benedicta, protagonistas da historia, o propio director salientaba o fito que supuña esta proxección ao converterse na primeira en lingua galega nas 72 edicións do certame. Pero a cousa non ficou aí, porque Laxe fíxose como premio do xurado na sección Un certain regard.

Este recoñecemento súmase así ao acadado polos seus anteriores filmes Todos vós sodes capitáns (2010), Premio Fipresci da Quincena de Realizadores de Cannes, e Mimosas (2016), Gran Premio da Semana da Crítica. Este terceiro galardón parece confirmar a fascinación internacional da singular maneira de ollar o mundo do galego, que contribuíu a poñer o cinema galego no mapa, sinalando para algúns críticos senón o comezo a eclosión daquilo que se deu en chamar Novo Cinema Galego, unha etiqueta en continua revisión e cuestionamento.

O que arde narra, durante as catro estacións do ano, dúas historias en paralelo: a dun veciño, Amador, que regresa á vila após cumprir unha condena acusado de provocar un incendio e a de dous brigadistas que comezan a traballar na loita contra os lumes. Porén, o filme non pon o foco na problemática da queima dos montes, senón no “ritmo milenario” da vida cotiá nesa cultura campesiña crepuscular representada por Amador e a súa nai Benedicta, que viven na compaña da cadela Lúa e tres vacas.

O que arde, con distribución de Numax, estrarase en Galicia a finais de ano.

MÁIS NOVAS
Aberto o prazo de inscrición para Novas olladas á costa galega (2ª ed.)
Este obradoiro de fotografía documental co Colectivo Ollo terá lugar os vindeiros 6 e 7 de xullo en Noia
15/05/2024

Os vindeiros 6 e 7 de xullo na Sociedade Liceo de Noia (Noia) e baixo a dirección de Mª Soliña Barreiro González e Jennifer Novoa Domínguez, terá lugar a 2ª edición deste obradoiro de fotografía documental organizado polo Grupo de Estudos Audiovisuais e o colectivo fotográfico Ollo. Constará de 16 horas lectivas cun límite de asistencia de 25 persoas. […]

Seguir lendo
Margarita Ledo Andión participa nas xornadas “50 anos do 25 de abril”
A Catedrática emérita do GEA estará presente no coloquio: "O 25 de abril do outro lado do Miño" na Facultade de Filoloxía da USC
12/04/2024

A Revolución dos Caraveis, o levantamento militar do 25 de abril de 1974 en Portugal, denominado en portugués Revolução dos Cravos, derrubou nun día o réxime político ditatorial que existía no país veciño desde 1926. As cinco xornadas que compoñen o programa das xornadas que conmemoran os 50 anos deste feito histórico, desenvolveranse desde o […]

Seguir lendo
30 aniversario da AGAPI
A segunda xornada terá lugar o mércores 17 de abril na Facultade de Ciencias da Comunicación da USC
12/04/2024

Neste 2024 AGAPI celebra o seu 30 aniversario e unha das accións que vai levar adiante é a celebración dunhas xornadas formativas itinerantes polas tres universidades galegas nas facultades de Ciencias da Información dentro do Grao de Comunicación Audiovisual da Universidade de Santiago de Compostela (USC), Universidade de Vigo (UVIgo) e Universidade da Coruña (UDC). […]

Seguir lendo
© 2024 Estudos Audiovisuais