O GEA participa no seminario ‘Medios responsables e cidadáns críticos’
Preséntanse os resultados do proxecto de investigación MediaACES
O xoves 29 de novembro de 2018 a Facultade de Ciencias da Comunicación da USC acollerá o seminario Medios responsables e cidadáns críticos. Eficacia e aceptación da rendición de contas en Galicia, no que se presentarán os resultados do proxecto de I+D+i ‘Accountability y Culturas Periodísticas en España. Impacto y propuesta de buenas prácticas en los medios de comunicación españoles’ (MediaACES |MINECO/FEDER, UE, ref: CSO2015-66404-P). Trátase dunha pesquisa dirixida pola Universitat Pompeu Fabra na que participa o Grupo de Estudos Audiovisuais da USC canda a Universidad Internacional de La Rioja, Mondragon Unibertsitatea, Universitat Jaume I e a Universidad de Sevilla.
Co obxectivo de detectar as culturas xornalísticas existentes en distintos territorios de España así como examinar o impacto das ferramentas de rendición de contas ou media accountability systems, o proxecto realizou unha enquisa a profesionais de Galicia, Madrid, Cataluña e de Euskadi, principalmente, para poder coñecer de primeira man as súas opinións. Ademais, nesta primeira fase da investigación, o equipo investigador procurou coñecer as impresións que os cidadáns teñen sobre a rendición de contas dos medios a través de focus groups, grupos de discusión realizados tamén nos distintos territorios da mostra.
Serán o investigador principal do proxecto, Marcel Mauri, da Universitat Pompeu Fabra, e a investigadora Marta Pérez Pereiro, do Grupo de Estudos Audiovisuais da USC, as persoas encargadas de dar coñecer en Compostela os datos extraídos até o momento. Estes servirán para abrir un coloquio coas persoas asistentes. Dirixido a profesionais e estudantes do ámbito da comunicación, o seminario busca xerar un debate para contrastar os resultados acadados e recabar as impresións das persoas participantes sobre a cultura e práctica xornalísticas do territorio.
O evento, de acceso libre, comeza ás 12.00 horas na Aula 8 da Facultade de Ciencias da Comunicación. Canda a celebración en Santiago, o seminario realizarase tamén no resto de sedes das distintas universidades participantes na investigación.
O vindeiro día 4 de febreiro, terza feira, ás 11h proxectárase no auditorio da Facultade de Ciencias de Comunicación da Universidade de Santiago o filme Morlaix. Posteriormente haberá un coloquio ao que asistirán o director da fita, Jaime Rosales, o Catedrático de Comunicación Audiovisual e Publicidade José Luis Castro de Paz e estudantes da facultade. […]
O pasado venres, día 29 de novembro, Rocío do Pilar Sosa Fernández, investigadora en formación do Grupo de Estudos Audiovisuais, defendeu a súa tese doutoral. Obtivo a cualificación Sobresaínte Cum Laude, por unanimidade, e a mención internacional pola estancia de investigación realizada na Universidade de Aalto, en Finlandia. A dirección da tese estivo a cargo […]
A auto-biografía política, dar a ver a súa construción, a marca do dispositivo, o real como material que “debe ser ficcionado para ser pensado (Rancière) é un dos sinais e tamén os arquivos re-significados polas escrituras do “eu”, polo corpo, polos seus ecos, pola actuación… son entradas polas que accedemos ao interior do labirinto a […]