O 12º Congreso Small Cinemas debate na Facultade de Ciencias da Comunicación o futuro da distribución e da conservación dos pequenos cinemas
O GEA organizou este evento itinerante, celebrado por primeira vez en Galicia, no que investigadores e investigadoras de todo o mundo falaron de modelos de distribución, sobre todo nas plataformas de Video on Demand, do impacto da Covid-19 no cinema e dos modos de conservación dos pequenos cinemas
O 12º Congreso Small Cinemas serviu, os días 28 e 29 de outubro, de espazo de encontro de investigadores e investigadoras que traballan no campo dos small cinemas, un termo acuñado pola profesora Mette Hjort en 2007, quen tamén participou no evento académico. Este evento itinerante tivo nesta edición o título “Do celuloide ao Streaming: conservación e circulación dos pequenos cinemas”, un punto de partida para a reflexión colectiva sobre como os cambios tecnolóxicos afectan á difusión, visibilidade e conservación dos pequenos cinemas.
A ponencia inaugural abordou a supervivencia do cinema danés das orixes e a súa transformación no mundo dixital, unha reflexión da profesora Claire Thomson, da University College London, que tivo resposta virtual da profesora Mette Hjort, da Hong Kong Baptist University. Pola súa banda, a docente da Universitat Oberta de Catalunya, Elena Neira explicou as posibilidades dos pequenos cinemas para achegárense ás súas audiencias na era pospandémica.
O Congreso Small Cinemas acolleu a celebración dunha mesa redonda na que representantes das filmotecas catalá, vasca, galega e portuguesa explicaron os principais desafíos aos que se someten estas institucións encargadas de conservar e poñer en valor o patrimonio audiovisual. A mesa serviu asemade como celebración do Día Mundial do Patrimonio Audiovisual, que cada ano se recorda o 27 de novembro.
Nos oito paneis que conformaron o congreso, que se celebraron de xeito presencial e online, abordáronse distintas liñas de investigación arredor da distribución en plataformas de filmes en linguas minoritarias, do impacto da Covid-19 no cinema, particularmente na exhibición, o as transformacións lexislativas sobre cinema e presentáronse proxectos de conservación de pequenos cinemas como o galego Proxecto Socheo, Nitrato Argentino ou Històries del Punt.
O congreso pechouse coa proxección do filme Os días afogados (2015), dirixido por César Souto Vilanova e Luis Avilés, un exemplo de cinema feito a partir de arquivos e que recupera a memoria do asolagamento en 1992 das aldeas de Aceredo e Burcalque.
Fotografía de @mario.llorca.loureiro
O vindeiro día 4 de febreiro, terza feira, ás 11h proxectárase no auditorio da Facultade de Ciencias de Comunicación da Universidade de Santiago o filme Morlaix. Posteriormente haberá un coloquio ao que asistirán o director da fita, Jaime Rosales, o Catedrático de Comunicación Audiovisual e Publicidade José Luis Castro de Paz e estudantes da facultade. […]
O pasado venres, día 29 de novembro, Rocío do Pilar Sosa Fernández, investigadora en formación do Grupo de Estudos Audiovisuais, defendeu a súa tese doutoral. Obtivo a cualificación Sobresaínte Cum Laude, por unanimidade, e a mención internacional pola estancia de investigación realizada na Universidade de Aalto, en Finlandia. A dirección da tese estivo a cargo […]
A auto-biografía política, dar a ver a súa construción, a marca do dispositivo, o real como material que “debe ser ficcionado para ser pensado (Rancière) é un dos sinais e tamén os arquivos re-significados polas escrituras do “eu”, polo corpo, polos seus ecos, pola actuación… son entradas polas que accedemos ao interior do labirinto a […]