Actualidade
Novas e Axenda Bota un ollo á actividade do GEA

As entidades polas linguas do Estado denuncian que coa Lei do Audiovisual se “perdeu unha oportunidade cara á igualdade”

27/05/2022

Representantes das principais entidades que traballan a prol das linguas minorizadas galega (A MESA), vasca (Euskalgintzaren Kontseilua), catalá (Plataforma per la Llengua, Ómnium, ACPV, Escola Valenciana e FOLC) e asturiana (Iniciativa Pol Asturianu) concentráronse diante do Congreso dos Diputados antes do inicio do debate da Lei xeral audiovisual, porque “a norma que se pretende aprobar non vai dar máis que pequenos pasos que non garanten a igualdade lingüística”. O GEA, xunto con outras organizaciósn do sector audiovisual, forma parte da Iniciativa polo audiovisual en galego, a plataforma que impulsou a presentación de enmendas á Lei de cara a promover unha lexislación realmente inclusiva.

En primeiro lugar denunciaron que se trata dunha lei que non responde á realidade lingüística existente no Estado: «Debemos ter en conta que esta lei é unha transposición da directiva da Unión Europea precisamente para dar cabida á produción europea. Deste xeito, fuxiuse da realidade lingüística europea, dando unha presenza indigna ás linguas propias do Estado. Coidamos sinceramente que se perdeu unha oportunidade para a igualdade e que a lei invisibilizará as nosas linguas nas pantallas. É máis, perpetuarase a vulneración de dereitos” afirmaron.

Así, os representantes das entidades fixeron referencia ao proceso de elaboración da lei: «os axentes sociais a favor das linguas mantivemos unha actitude proactiva, facendo achegas concretas nos anteproxectos, trasladando aos partidos as nosas propostas, activando á cidadanía para demostrar a existencia unha demanda social». Malia isto, fixéronse ouvidos xordos ás nosas peticións, polo que se pode dicir que a demanda cidadá no foi tida en conta en absoluto na lei».

Ademais, lembraron varios elementos recollidos na declaración consensuada xunto con outros axentes (CIEMEN, TIRANT e OCB do catalán, e NOGARÁ do aragonés): “Se ben a presión política e social exercida polas entidades foi determinante para incluír mínimos para todas as linguas tanto nas cotas de catálogo das plataformas e retransmisións de TVE, como no financiamento antecipado, as mudanzas introducidas son claramente insuficientes e testemuñais ao representaren entre o 0,35% e o 2,55% do conxunto”. Quer dicir, “as cotas que se estabelecerán co suposto obxectivo de garantir a pluralidade lingüística son testemuñais”.

E é que, tal e como afirmaron as entidades, a lexislación xeral audiovisual só estabeleceu porcentaxes obrigatorias de contidos mínimos e financiamento para o español, sen nengunha indicación nen recoñecemento para outras linguas existentes no Estado español fóra da retórica baleira. Isto impede que as crianzas, mocidade y o público en xeral poidan gozar na súa lingua da ampla oferta dispoñíbel de programas de televisión, series e filmes. “Por desgraza a nova lei non supón mudanzas significativas neste senso”, afirmaron.

Para finalizar, os axentes a favor das linguas minorizadas quixeron reiterar o seu compromiso de seguir traballando: «É certo que nesta ocasión non se cumpriron os obxectivos previstos e que aprobarán unha lei que invisibiliza a presenza das nosas linguas. Porén, continuaremos a traballar para crear as condicións adecuadas para vivirmos nas nosas linguas e gañaren espazos, entre eles as pantallas”, subliñaron.

MÁIS NOVAS
O Repertorio da Radio Galega da Emigración incorpórase ao catálogo da FaCom (USC)
Este recolle as actividades radiofónicas realizadas e protagonizadas polos emigrantes galegos fundamentalmente en América e Europa (1930 ata a actualidade).
17/07/2024

O Repertorio da Radio Galega da Emigración está dispoñible para consulta en sala na biblioteca da Facultade de Ciencias da Comunicación da Universidade de Santiago de Compostela. Un catálogo histórico das actividades radiofónicas realizadas e protagonizadas polos emigrantes galegos fundamentalmente en América e Europa, pero tamén noutros destinos menos frecuentes con presenza galega. Cronoloxicamente abrangue desde […]

Seguir lendo
Aberto o prazo para os Premios María Luz Morales
Este certame de ensaio e vídeoensaio está organizado pola Academia galega do Audiovisual
04/07/2024

A oitava edición dos Premios María Luz Morales de Ensaio e Vídeoensaio sobre o Audiovisual está en marcha. Os Premios María Luz Morales de Ensaio e Vídeoensaio sobre o Audiovisual son unha iniciativa que busca impulsar a produción académica relacionada co ámbito audiovisual. E estimularon a produción de 179 traballos de investigación en materia audiovisual desde a súa […]

Seguir lendo
Seminario “Película sen facer. Elementos dun cinema latente”
Os días 1 e 2 de xuño, no (S8) Mostra de Cinema Periférico da Coruña.
22/05/2024

O seminario, , parte do (S8) Mostra de Cinema Periférico da Coruña, dirixido a artistas, comisarios, cineastas, programadores, investigadores, arquiveiros e estudantes, de acceso libre, xira ao redor das películas inacabadas ou cuxa finalización foi truncada por motivos políticos, financeiros ou persoais, que nos conducirán por territorios como Irán, Marrocos, Corea do Sur ou España. […]

Seguir lendo
© 2024 Estudos Audiovisuais