Varios traballos do Proxecto de Investigación sobre a pegada de Wencesalo Fernández Flórez no cinema posbélico presentaranse esta semana no XIV Congreso da AEHC

Entre o xoves e o sábado desta mesma semana celebrarase en Bilbao o XIV Congreso Internacional da Asociación Española de Historiadores do Cine, co título “De Cimientos y Contrafuertes. El papel de los géneros en el Cine Español”.
Como xa anunciaramos o mes pasado, o Congreso acollerá una ampla representación de estudos vinculados ao Proxecto de Investigación “Cara unha reconsideración da cultura posbélica: análise dos modos de representación no cinema español (1939-1962) a partir da pegada de Wenceslao Fernández Flórez”. Deste xeito, o xoves 28 os investigadores Alejandro Montiel Mues (Universidade Politécnica de Valencia), Héctor Paz Otero (Universidade de Santiago de Compostela) e Fernando Gómez Beceiro (Universidade de Santiago de Compostela) intervirán na primeira das sesións científicas con tres relatorios nos que exporán diversos aspectos analizados ao abeiro do Proxecto, incluíndose ademais na devandita mesa o resumo da comunicación da integrante do Equipo de Traballo, Sonia García López (Universidade Carlos III de Madrid). Por outra banda, o venres 29 será a quenda do Investigador Principal, José Luis Castro de Paz, para presentar as principais claves da investigación no espazo reservado á Presentación de Proxectos. Finalmente, o sábado 30 presentará a súa ponencia Imanol Zumalde (Universidade do País Vasco).
Á marxe da presenza destas cuestións propias da investigación, gran parte dos membros do equipo estarán implicados, dun ou outro xeito, no evento, destacando a participación do catedrático da Universidade do País Vasco, Santos Zunzunegui, como Presidente de Honra do Congreso.