Unha mesa redonda analiza a crítica en lingua galega na Filmoteca de Galicia

A Filmoteca de Galicia acolle os días 3 e 4 de decembro os actos de despedida da revista A Cuarta Parede, a publicación de crítica cinematográfica que foi un referente durante quince anos no ámbito galego. Fundada en 2011 por Eloy Domínguez Serén, membro do Grupo Estudos Audiovisuais, e Víctor Paz Morandeira, Tal e como recolle a Filmoteca de Galicia, A Cuarta Parede naceu como resposta a unha necesidade evidente: falar de cinema en galego. Nun momento no que as voces da crítica cinematográfica eran escasas no noso país, a revista converteuse rapidamente nun espazo pioneiro de encontro e reflexión, así como nun fío que permitiu trazar e acompañar a evolución dun movemento entón incipiente, o Novo Cinema Galego, situándoo nun diálogo horizontal coas grandes cinematografías internacionais.

A mesa redonda ‘A crítica de cinema en galego’ analizará o estado da crítica desde perspectivas complementarias de diversos ámbitos da industria e da academia, representadas por perfís que, ao longo destes quince anos, acompañaron e apoiaron de maneira decisiva a evolución e o traballo de A Cuarta Parede. Participarán Beli Martínez (profesora da UVigo e produtora), Marta Pérez  Pereiro (profesora da USC e membro do Consello de Redacción de A Cuarta Parede) e Ángel Sánchez (director do festival Play-Doc), e estará moderada por Brais Romero, exdirector da revista, como indica a web da Filmoteca de Galicia.