
“O que arde” consegue catro candidaturas aos Premios Goya 2020
Competirá polos galardóns a mellor película, mellor dirección, mellor actriz revelación e mellor fotografía
A Academia das Artes e as Ciencias Cinematográficas de España vén de anunciar as candidaturas aos Premios Goya 2020, nas que o cinema galego sobresae cos catro nomeamentos para O que arde (Óliver Laxe, 2019) nas categorías de Mellor dirección, Mellor película, Mellor actriz revelación, con Benedicta Sánchez (O Corgo, Lugo), e Mellor fotografía, a través do catalán Mauro Herce.
Logo de converterse no filme en galego máis visto da historia nas salas comerciais do estado español e de sumar numerosos premios en festivais internacionais, entre os que sobresae o premio do xurado na sección Un certain regard do Festival de Cannes, a película de Óliver Laxe competirá coas propostas dos veteranos Alejandro Amenábar (Mientras dure la guerra) e Pedro Almodóvar (Dolor y Gloria); coa terceira película, rodada desta vez en castelán, polos cineastas vascos Jose Mari Goenaga, Jon Garaño e Aitor Arregide; e con Intemperie, de Benito Zambrano.
Sobre o nomeamento de Benedicta Sánchez, de 84 anos, como actriz revelación, Koldo Zuaza, un dos produtores de O que arde, recoñeceu que a súa é a candidatura que máis ilusión fai entre o equipo. «Benedicta é unha persoa extraordinadira, transmite moita verdade e estou feliz de ter traballado con ela», afirmou. Benedicta presentarase ao casting sen ter experiencia previa no cinema, animada pola súa filla, e Óliver Laxe viu nela case de forma inmediata á súa protagonista. «Conectou comigo porque teño lingua de trapo, e dixo que me escollía se deixaba o pelo longo. Foi a súa única condición», asegurou a actriz nunha entrevista.
O audiovisual galego suma 10 candidaturas nesta edición dos Goya, que se entregarán o 25 de xaneiro de 2020 en Málaga. Ás catro de O que arde engádense o nomeamento a mellor curtametraxe de animación para Homomaquia, dirixida por David Fidalgo Omil e producida por Chelo Loureiro; mellor actor protagonista para o lucense Luís Tosar, por Quien a hierro mata —produción de Vaca Films nomeada tamén nos galardóns de mellor actor revelación e mellor son—, mellor actor revelación para o vigués Santi Prego (Mientras dure la guerra) e a candidatura compartida polo coruñés Eligio Montero e Salvador Simó ao mellor guión adaptado polo filme de animación Buñuel en el laberinto de las tortugas.

O GEA participou na Conferencia internacional “Personal Perspective and Essayistic Form in Nonfiction Film and Art” en Vilnius, Lituania. A representación do Grupo de Estudos Audiovisuais estivo formada pola Catedrática Emerita de Comunicación Audiovisual da USC e IP Margarita Ledo, a profesora Marta P. Pereiro e os profesores Cibrán Tenreiro e Eloy Domínguez.
A Asociación Española de Investigación de la Comunicación (AE-IC) celebrará o seu IX Congreso Internacional na Facultade de Comunicación e Documentación, Campus Espinardo, da Universidade de Murcia, do 28 ao 31 de maio de 2024 baixo o lema “Comunicación e Innovación Sostíbel”. O Congreso convoca aos/ás investigadores/as en comunicación, nomeadamente no ámbito español, europeo e […]
Os días 14 e 15 de setembro de 2023 celebrarase no Auditorio da Facultade de Ciencias da Comunicación da USC o seminario Cinema e deporte. Clase xénero e cuestión nacional. Este seminario está organizado polo Grupo de Estudos Audiovisuais da Universidade de Santiago de Compostela, Cinema. Col.lectiu d´Investigació Estètica des Mitjans Audiovisuals da Universidade Pompeu […]