Dous libros do I+D+i sobre o cinema español posbélico serán presentados o día 27 de febreiro na Fundación Wenceslao Fernández Flórez

O vindeiro venres 27 de febreiro a Casa Museo, Centro de Estudos e Sede da Fundación Wenceslao Fernández Flórez acollerá a presentación dos libros Tragedias de la vida vulgar. Adaptaciones e irradiaciones de Wenceslao Fernández Flórez en el cine español e El malvado Carabel: literatura y cine popular antes y después de la Guerra Civil, froito do resultado dalgunhas das principais liñas de investigación que se están a desenvolver no Proxecto de Investigación Cara unha reconsideración da cultura posbélica: análise dos modos de representación no cinema español (1939-1962) a partir da impronta de Wenceslao Fernández Flórez (CSO2012-34648, Plan Nacional de I+D+i 2013-2015, Mineco – Goberno de España).
Editado por Shangrila e coordinado por José Luis Castro de Paz, José María Folgar de la Calle, Fernando Gómez Beceiro e Héctor Paz Otero, Tragedias de la vida vulgar. Adaptaciones e irradiaciones de Wenceslao Fernández Flórez en el cine español recolle as actas do Simposium Internacional Costumismo, humor, melancolía, reflexividade: Impronta de Wenceslao Fernández Flórez no cinema español, eixe fundamental do Proxecto no que os máis prestixiosos especialistas na obra literaria de Fernández Flórez e destacados historiadores do cinema afondaron na decisiva influencia da obra do escritor galego na conformación de certos modelos de estilización no cinema español posbélico. Por outra banda, o segundo volume constitúe un rigoroso estudo de José Luis Castro de Paz e Héctor Paz Otero sobre as destacadas adaptacións fílmicas acometidas por Edgar Neville en 1935 e Fernando Fernán-Gómez en 1955 da novela El malvado Carabel, erixíndose así como singular ponte entre o mellor cinema popular republicano e a crispada resposta ante o horror franquista do cinema máis rebelde dos anos cincuenta. Publicado por Vía Láctea Editorial, o libro é ademais o número inicial da colección Cuadernos de Cine y Cultura Posbélica Española, creada para a difusión dos estudos abordados polo Proxecto, co patrocinio da Fundación Wenceslao Fernández Flórez.
O Investigador Principal do Proxecto e Presidente da Fundación Wenceslao Fernández Flórez, José Luis Castro de Paz, aproveitará a ocasión para presentar os obxectivos e negociacións inmediatas da institución. Firmaranse ademais convenios de colaboración co Grimh e a AEHC.
Xunto ós autores, asistirán ó acto a vicepresidenta da Deputación da Coruña Mariel Padín, o alcalde de Cambre Manuel Rivas Caridad, o presidente da Asociación Española de Historiadores do Cinema Julio Pérez Perucha, o presidente honorífico do Grimh Jean Claude Seguin e os presidentes de honra da Fundación WFF Wenceslao e Antonio Luis Fernández Flórez.

COMUNICADO. INVITACIÓN