Actualidade
Novas e Axenda Bota un ollo á actividade do GEA

Dispoñible o programa do “Congreso Internacional de Hispanismo e Cinema”

Organizado polo grupo TECMERIN na UC3M entre o 2 e o 5 de xullo, contará coa presenza de Margarita Ledo e José Luis Castro de Paz

27/06/2019

O Congreso Internacional de Hispanismo e Cinema – VI Encontro académico TECMERIN terá lugar entre o 2 e o 5 de xullo na Universidade Carlos III de Madrid (UC3M). A coordinadora do Grupo de Estudos Audiovisuais, Margarita Ledo Andión, proxectará o seu filme Santa Liberdade (2004) o venres 5 de xullo no Cinema Doré, despois da mesa de clausura ¿Canon o cánones sobre cine español? na que, baixo a moderación de Juan Carlos Ibáñez (UC3M), participan Josetxo Cerdán (Director Filmoteca Española), Marina Díaz (Instituto Cervantes) e o tamén membro do GEA José Luis Castro de Paz (USC).

A atención polo cinema no campo dos estudos de hispanismo medrou evidentemente nas últimas décadas, chegando a afirmarse que este e outros medios audiovisuais deron un novo impulso ao hispanismo nos tempos da globalización económica e cultural. Este auxe da unión entre os estudos de cinema e hispanismo sucede en paralelo á implantación e consolidación do cinema como disciplina universitaria.

Cinema e hispanismo, un matrimonio feliz

Son varios os factores que viñeron favorecendo esta unión. En primeiro lugar, unha mesma reformulación da noción de hispanismo, que permitiu reducir as distancias entre as distintas escolas culturais e xeográficas. En segundo lugar, o cinema demostrou ser unha ferramenta útil para o ensino do español. En terceiro lugar, as modificacións epistemolóxicas e metodolóxicas dos estudos de literatura comparada axudaron a que estas se combinen con fluidez e coexistan coa análise das expresións fílmicas. En cuarto lugar, cada vez é máis frecuente atopar profesionais académicos formados no campo do cinema. Xeración tras xeración, estes académicos contribuíron con teses doutorais e investigacións vinculadas ao cinema desde o inicio das súas carreiras, desenvolvendo unha bibliografía cada vez máis frutífera.

Os estudos de cinema permitiron ao mesmo tempo expandir as posibilidades xeográficas do hispanismo, que demostrou o seu interese en estudar a produción cultural da península ibérica (incluídas as linguas minoritarias), así como a dos países de Latinoamérica, dos hispanos de Estados Unidos e doutras diásporas, dando senso a un hispanismo trasatlántico e global. O cinema, coas súas formas de circulación, favoreceu a comunicación intercultural nun mundo no que o binomio de modernidade e globalización se despraza e cuestiona os modos tradicionais de representación.

Conferencias + Ciclo de filmes

Consonte estas ideas, o Grupo de Investigación TECMERÍN. Televisión-cine: memoria, representación e industria propón un programa variado con paneis, mesas de debate e conferencias plenarias que xa pode consultarse na web do congreso. De maneira completementaria ás exposicións máis teóricas, existirá un ciclo de cinema na Filmoteca Española, do que fai parte a proxección de Santa Liberdade, que inclúe tamén os filmes Goya en Burdeos (Carlos Saura, 1999), Poniente (Chus Gutiérrez, 2002), ¡Vente a Alemania, Pepe! (Pedro Lazaga, 1971) e Jamón, jamón (Bigas Luna, 1992).

MÁIS NOVAS
Margarita Ledo Andión participa no Málaga Docs
A profesora Ledo Andión escribiu o limiar do libro colectivo El documental en España. Historia, estética e identidad.
14/03/2023

O Festival de Málaga retoma as xornadas Málaga Docs coa publicación do libro colectivo El documental en España. Historia, estética e identidad, editado por Cátedra e o propio festival. Complementando a presentación deste volumen celébrase o Encuentro de Cine Documental 2023, En el espejo: una mirada compartida al cine documental en España, que traslada algúns dos […]

Seguir lendo
Chamada de Artigos para a revista Cinema & Território (C&T)
Está aberta a "Chamada de Artigos" para o n.º 8 da Cinema & Território, sobre a temática Documentais (auto)biográficos
06/03/2023

A revista Cinema & Território (C&T) é unha publicación científica anual e internacional de arte e antropoloxia das imaxes da Universidade da Madeira (UMa). A C&T está aberta a propostas para publicación de investigadores internos e externos á UMa, que se encadren nos dominios das artes e dos estudos cinematográficos, da antropoloxia visual e das imaxes […]

Seguir lendo
Premio Mozo de Investigación en Comunicación ‘Enrique Bustamante’
A Asociación Española de Investigación de la Comunicación (AE-IC ) convoca o Premio Mozo de Investigación en Comunicación 'Enrique Bustamante'.
03/03/2023

O certame ten dúas modalidades: monografía e artigo, o premio consistirá nun Diploma acreditativo e unha axuda de até 1.500€ para gastos de publicación do mellor monográfico presentado, e de 400€ para o mellor artigo que supere o proceso de revisión para ser publicado na Revista de la Asociación Española de Investigación de la Comunicación […]

Seguir lendo
© 2023 Estudos Audiovisuais