Amtega organiza o “I Foro de Debate Profesional” para a Galicia do 2030

A primeira semana de xullo celébrase, no marco da Estratexia Dixital de Galicia 2030, o I FORO DE DEBATE PROFESIONAL co obxecto de impulsar o diálogo e a colaboración entre axentes públicos e privados necesaria para a identificación e resolución dos desafíos dixitais aos que se enfronta Galicia nun novo paradigma de sociedade onde todo está conectado e as tecnoloxías se fusionan.

É unha iniciativa da Axencia para a Modernización Tecnolóxica (Amtega) co fin de configurar a Galicia 5.0, aproveitando as tecnoloxías dixitais para contribuír ao desenvolvemento sostible da Comunidade a nivel económico, social e medioambiental. O enfoque do evento incorporará a perspectiva de especialización funcional, distinguindo distintos grupos de debate en función da natureza dos desafíos a tratar. Estará deseñado de xeito práctico para que todos os asistentes interactúen, centrándose na identificación de pancas a considerar para conformar a sociedade galega do futuro.

A celebración dos distintos grupos pivotará en torno ás tres universidades galegas. Os debates baixo a temática “Vida Dixital & Intelixente” desenvolveranse o próximo día 2 de Xullo na Facultade de Ciencias da Comunicación da USC. Dentro deste tópico trataranse tres epígrafes principais: “Saúde & Benestar”, “Educación Dixital” e “Identidade & Cultura”. Os tres bloques restantes versan sobre “Territorio Verde & Conectado”, “Economía Aberta” e “Especialización Tecnolóxica”.