De illas e sereas, entre os máis vendidos da Libraría NUMAX

O terceiro volume da serie Para unha historia do cinema en lingua galega, editado polo Grupo de Estudos Audiovisuais e a Editorial Galaxia, está a ter unha moi boa acollida. Os datos da Libraría NUMAX, un dos espazos de referencia en Galicia para a literatura sobre cinema, sitúan neste momento De illas e sereas entre os libros máis vendidos, xunto a fenómenos editoriais como Panza de burro de Andrea Abreu ou Las maravillas de Elena Medel.

De illas e sereas transita os filmes galegos estreados no último ano e algúns que están aínda por estrear, á vez que rescata outras pezas fóra de circuíto convencional, nunha singradura polas illas fílmicas e as sereas que as habitan, que dá pé a unha construción crítica da historia cinematográfica galega «á marxe de servidumes académicas e desde a crítica aos modos obsoletos de pensar nas películas». Baixo a coordinación de Margarita Ledo Andión, escriben no libro outros membros do GEA como Fernando Redondo Neira, Cibrán Tenreiro Uzal,  Antía López Gómez, José Luis Castro de Paz ou Marta Pérez Pereiro, e convidados como Alberte Pagán ou Pablo Súarez-Mansilla. É posible mercalo na maioría de librarías galegas e na web de Galaxia.