Actualidade
Novas e Axenda Bota un ollo á actividade do GEA

Aberto o prazo de inscrición para o simposio `Malestares na cultura espec(tac)ular: perspectivas críticas desde a psicanálise´

A actividade, organizada polo GEA, terá lugar os vindeiros 12 e 13 de xuño na Facultade de Cc. da Comunicación

21/05/2024

Baixo o título “Malestares na cultura espec(tac)ular: perspectivas críticas desde a psicanálise”, o Grupo de Estudos Audiovisuais (GEA) organiza os días 12 e 13 de xuño un simposio para abordar as crebas das subxectividades contemporáneas desde un enfoque interdisciplinar que, a partir da constelación común do campo psicanalítico, integra a análise audiovisual, a crítica filosófica e a orientación clínica.

Francisco Conde, psicanalista e profesor de Filosofía na USC, abrirá o simposio o mércores 12 cunha conferencia titulada “O triunfo do imaxinario lacaniano: do Edipo ao selfie”. Ese mesmo día, a tamén psicanalista Rosa Vázquez tratará, á súa vez, o rexistro do simbólico e, máis concretamente, a repercusión da súa decadencia tal e como se manifesta no ámbito da clínica de orientación psicanalítica, cunha palestra titulada: “A orientación lacaniana no século XXI: decadencia do simbólico, novas modalidades do síntoma e clínica do exceso”.

A segunda sesión, o xoves 13, comezará coa ponencia “A tiranía da beleza e a máscara dixital nas redes sociais”, a cargo da profesora Antía López, membro do GEA, que analizará as transformacións da propia identidade no contexto audiovisual virtual. Pechará o simposio a intervención “O malestar non é o que pensas. Freud e a cultura”, de Delmiro Rocha, docente da Facultade de Humanidades da USC e filósofo especializado na crítica da cultura e na noción de deconstrución formulada por Jacques Derrida.

A asistencia ao simposio é libre até completar aforo, mais prégase inscrición previa no seguinte formulario até o luns 10 de xuño

MÁIS NOVAS
Proxección e coloquio: Morlaix (Jaime Rosales, 2024) o día 4 de febreiro
A proxección e o coloquio serán no Auditorio da Facultade de Comunicación
20/01/2025

O vindeiro día 4 de febreiro, terza feira, ás 11h proxectárase no auditorio da Facultade de Ciencias de Comunicación da Universidade de Santiago o filme Morlaix. Posteriormente haberá un coloquio ao que asistirán o director da fita, Jaime Rosales, o Catedrático de Comunicación Audiovisual e Publicidade José Luis Castro de Paz e estudantes da facultade. […]

Seguir lendo
Defensa da tese doutoral: «Análise do potencial educativo presencial e a distancia utilizando recursos inmersivos en realidade virtual e aumentada».
03/12/2024

O pasado venres, día 29 de novembro, Rocío do Pilar Sosa Fernández, investigadora en formación do Grupo de Estudos Audiovisuais, defendeu a súa tese doutoral. Obtivo a cualificación Sobresaínte Cum Laude, por unanimidade, e a mención internacional pola estancia de investigación realizada na Universidade de Aalto, en Finlandia. A dirección da tese estivo a cargo […]

Seguir lendo
Conferencia de Margarita Ledo Andión na Sorbonne Nouvelle: A imaxe que falta, a imaxe que manca
Será na sala C112A da Sorbonne Nouvelle o día 9 de decembro, ás 11h
02/12/2024

A auto-biografía política, dar a ver a súa construción, a marca do dispositivo, o real como material que “debe ser ficcionado para ser pensado (Rancière) é un dos sinais e tamén os arquivos re-significados polas escrituras do “eu”, polo corpo, polos seus ecos, pola actuación… son entradas polas que accedemos ao interior do labirinto a […]

Seguir lendo
© 2025 Estudos Audiovisuais