Actualidade
Novas e Axenda Bota un ollo á actividade do GEA

Aberta a inscrición para a sétima edición do CO(M)XÉNERO

O Seminario Permanente de Comunicación e Xénero está titulado desta volta `Descifrando Violencias´

21/10/2022

A sétima edición do CO(M)XÉNERO, Seminario Permanente de Comunicación e Xénero terá lugar nos días 3 e 4 de novembroi na Facultade de Ciencias da Comunicación da USC, organizado polo Grupo de Estudos Audiovisuais (GEA) co apoio do Pacto de Estado contra a Violencia de Xénero. Nesta ocasión, as xornadas céntrase no ollar, debater, e aprender a descifrar diferentes modos e maneiras de violencia, latentes ou que podemos tocar ca man.

Coordinado pola directora do GEA, a catedrática Margarita Ledo Andión, o seminario está dirixido a estudantes de comunicación, persoal investigador en formación, profesionais e, en xeral, a todas as persoas interesadas en abordar as diferentes violencias heteropatriarcais que nos atravesan. A participación no CO(M)XÉNERO pode ser recoñecida como actividade formativa para o estudantado do Programa de Doutoramento en Comunicación e Información Contemporánea.

Esta  “comunidade electiva” que se foi entrelazando á volta do  CO(M)XÉNERO chega á súa edición número 7 para ollar, debater, e aprender a descifrar diferentes modos e maneiras de violencia, latentes ou que podemos tocar ca man.

Da muller-monstro no cinema de terror, entre as cales a muller-lobo tan presente nas nosas fábulas ou a muller-caníbal, falaranos Itxaso del Castillo, ensinante na Universidade do País Vasco, mentres Silvia Roca, investigadora do GEA, vainos desacougar dando a coñecer como se nos representa na ficción galega.

As pezas de María Ruido, artista multimedia e profesora  na Universidade de Barcelona acollen a  pequena e gran transgresión ate o límite canda unha nova alfaia, `Las reglas del juego´, esa conversa con Brigitte Vasallo que vai acordar todas as sospeitas sobre a performarce do propio corpo, un corpo que queremos liberado dos medos e dos espazos escuros da agresión permanente.

O Obradoiro de Adriana Páramo e de Iria Pinheiro, `O escenario por cámara´, trae á tona aspectos desa ferida que se singulariza como “violencia obstrética”.

Aos 5 anos do #MeToo podemos celebrar  pasos avante na  acción de contar, esixir responsabilidades, concienciar e partillar.

Esta edición está financiada con fondos do Pacto de Estado contra a Violencia de Xénero (Ministerio da Presidencia, Relacións coas Cortes e Igualdade) e da Xunta de Galicia a través da convocatoria 2019 de axudas para a consolidación e estruturación de unidades de investigación competitivas, da que é beneficiario o GEA.

A actividade está aberta ao público en xeral, pero diríxese especialmente a profesionais e persoal investigador no ámbito das ciencias da comunicación, estudantes do Programa de Doutoramento en Comunicacion e Información Contemporáneas (a participación no seminario será considerada AF), e estudantes dos graos de Comunicación Audiovisual e Xornalismo.

O programa inclúe conferencias, sesións de proxeccións e debate, así como obradoiros para achegármonos a outra forma de contar.

A inscrición é de balde e está aberta ata o 1 de novembro a través deste formulario.

 

 

 

 

MÁIS NOVAS
Roi Méndez e Rocío del Pilar Sosa presentan The White Book for teaching through virtual TV sets
A comunicación na Open Universiteit tivo lugar o 8 de marzo.
14/03/2024

A conferencia Cloudclass: Innovative teaching with virtual studio technology tivo lugar o pasado 8 de marzo de 2024 na Open Universiteit (Heerlen). Educadores, expertos técnicos e estudantes reuníronse coa fin de afondar no ámbito da tecnoloxía inmersiva e nas súas aplicacións na educación. O evento, que marcou a culminación do proxecto CloudClass: Low Cost, Mobile, […]

Seguir lendo
Margarita Ledo Andión recibe o XII Premio de Igualdade “Ernestina Otero” 
A Catedrática recollerá este recoñecemento o vindeiro venres 15 de marzo.
07/03/2024

O Concello de Vigo e o Consello Municipal da Muller entregarán o Premio de lgualdade ”Ernestina Otero” á Catedrática emérita e membro do Grupo de Estudos Audiovisuais, Margarita Ledo Andión. A entrega do premio honorífico realizarase no transcurso dunha gala que terá lugar o venres 15 de marzo ás 20:00 horas no salón de recepcións […]

Seguir lendo
Aberta a inscrición para a décima edición do CO(M)XÉNERO. Imaxes do delito.
O seminario terá lugar nos días 8 e 9 de abril na Facultade de Cc. da Comunicación.
26/02/2024

Os días 8 e 9 de abril de 2024, a décima edición do CO(M)XÉNERO, organizada polo Grupo de Estudos Audiovisuais (GEA), aborda as prácticas fotográficas feministas, os espazos nos que se producen, as posicións dende as que se enuncian e os seus mecanismos de visibilización. Pilar Aymerich, Premio Nacional de Fotografía 2021, capturou coa súa […]

Seguir lendo
© 2024 Estudos Audiovisuais