Actualidade
Novas e Axenda Bota un ollo á actividade do GEA

Remata a rodaxe da webserie interactiva “Amnesia 3.0”

A integrante do GEA Irene Pin dirixe este proxecto, premio á produción no Carballo Interplay

11/09/2019

Amnesia 3.0, webserie gañadora do premio a desenvolvemento de proxecto na última edición do Carballo Interplay (CIP), rematou o pasado domingo a súa rodaxe, que tivo lugar entre os concellos de Santiago de Compostela, Carballo e Zas. A integrante do GEA Irene Pin é guionista e directora desta aventura audiovisual, logo de erguerse co premio xunto ás antigas alumnas da Facultade de Ciencias da Comunicación da USC Iria Iglesias e Natalia Porca. Co apoio económico do galardón estrearán en 2020 3 capítulos de 10 minutos de duración, que presentan varias versións.

Amnesia 3.0 é unha webserie interactiva na que o espectador pode escoller o punto de vista desde o que se conta a historia. As distintas focalizacións do relato pretenden incidir sobre a importancia non só dos feitos que che contan, senón de como chos contan e, sobre todo, quen. De tal xeito, as súas creadoras traballan con moita inspiración de Black Mirror para construír unha historia de ciencia ficción que promove a reflexión filosófica sobre a memoria e a identidade, desde unha perspectiva galega e con forte compromiso social.

A equipa está conformada por mozas e mozos de diferentes áreas do mundo audiovisual, de demostrada valía a pesar da súa xuventude. A ficción está protagonizada por Vanessa Dorrei, Daniel Celester, Sara Ferro e Duarte Galbán. O elenco combina estes novos talentos interpretativos con caras coñecidas do panorama audiovisual galego, como Monti Castiñeiras, Isabel Naveira e Sabela Arán.

Sinopse

265-C érguese cada mañá para seguir o seu plan de actividades, sen lembrar o que aconteceu o día anterior. Axudadas por un software implantado nos seus cerebros, as persoas borran a información asimilada no apartado da memoria a curto prazo, deixando que as súas axendas electrónicas guíen a súa vida cotiá. Pero dentro desta harmoniosa utopía, hai quen sobrevive na marxe. Son excluídxs, habitantes das Estremas, gardiás dun pasado sepultado. As irmás Fiz e Lía farán colisionar este territorio ao entrar na vida de 265-C, tratando mediante unha tecnoloxía arcaica de facerlle lembrar. Ao mesmo tempo, as súas accións son perseguidas e monitorizadas por un anónimo inspector do Departamento de Seguridade Global.

MÁIS NOVAS
O GEA participa na reunión con Nestor Rego para valorar a situación da Lei do Audiovisual
Profesionais de distintos ámbitos do sector trasladaron as súas posicións ao deputado do BNG
20/06/2022

Este luns 20 de xuño tivo lugar na Facultade de Ciencias da Comunicación da USC un encontro co deputado do BNG, Nestor Rego, para facer un balance do escenario que se formula para o sector coa aprobación da Lei do Audiovisual. Ao encontro asistiron representantes de varias das entidades que forman a Iniciativa polo audiovisual en […]

Seguir lendo
Agapi organiza a xornada “Marco xurídico do sector audiovisual: retos de futuro”
A actividade celebrarase o 1 de xullo no Auditorio 1 do Edificio CINC da Cidade da Cultura
17/06/2022

Agapi (Asociación Galega de Produtoras Independentes) organiza o vindeiro día 1 de xullo unhas xornadas de formación presencial dedicadas a analizar aspectos xurídicos da produción audiovisual. O desenvolvemento da xornada terá lugar no Auditorio 1 do Edificio CINC da Cidade da Cultura de Galicia, en Santiago de Compostela. Baixo o título: Marco xurídico do sector […]

Seguir lendo
A doutoranda do GEA, Sara Calvete, finalista do concurso ‘Three Minute Thesis’ (3MT®)
A final do certame organizado pola EDIUS celebrarase o 27 de xuño na Nave de Vidán
15/06/2022

A USC, a través da súa Escola de Doutoramento Internacional (EDIUS), puxo este ano en marcha a primeira edición do Three Minute Thesis (3MT®), un concurso de comunicación para investigadores e investigadoras de todas as áreas do coñecemento. A doutoranda do GEA, Sara Calvete Lorenzo, é unha das finalistas do certame co vídeo no que […]

Seguir lendo
© 2022 Estudos Audiovisuais