Actualidade
Novas e Axenda Bota un ollo á actividade do GEA

Presentación do informe da Sociedade Dixital en España 2018

Hiperconectividade, hiperpersonalización e cidadanía

03/04/2019

A Fundación Telefónica ven de presentar, como cada ano, o Informe da Sociedade Dixital en España (sdiE). Desde o 2000, este documento converteuse nun referente que recolle os indicadores sociais máis relevantes do panorama da sociedade dixital, así como analiza a evolución dos servizos dixitais e infraestruturas no ámbito nacional.

O sdiE constitúe unha radiografía do avance das transformacións que experimenta o país  grazas ás tecnoloxías. Cada edición inclúe datos e cifras obxectivas, xunto a un estudo sobre as tendencias e a posible evolución futura. O pasado ano supuxo a materialización das liñas que xa se manifestaban nos informes anteriores: a sociedade en rede deixou de constituír unha visión futurista para facerse cada vez máis patente.

A edición de 2018 pon en relevo o papel que xoga a banda ancha, tanto fixa como móbil, no proceso de dixitalización, incidindo especialmente na importancia do 5G como porta a un mundo hiperconectado. Progresivamente, os cidadáns e as empresas van adoptando a tecnoloxía e os servizos en rede como elementos cotiás. A este respecto, entre os fitos y tendencias do ano, o informe destaca a chegada dos asistentes intelixentes, a proliferación nas  fábricas dos robots colaborativos, a preferencia pola mensaxería instantánea da “xeración mute”, o incremento das plataformas de pago para ver contidos audiovisuais online nos fogares ou o protagonismo que adquiren as fake news.

Asemade, a análise masiva de datos con algoritmos de intelixencia artificial permite xa dar resposta ao gran reto actual da hiperpersonalización. Pero neste panorama preséntase tamén a confianza dixital como reto, un problema evidenciado no último ano polo alcance global do escándalo de Cambridge Analytica. A preocupación dos cidadáns pola súa privacidade en internet, e polo emprego que se fai dos seus datos persoais, maniféstase na axenda política coa entrada en vigor en Europa do Regulamento Xeral de Protección de datos e a aprobación en España da Lei Orgánica de Protección de Datos. O informe fai fincapé na necesidade de pór ás persoas e aos seus dereitos no centro do debate, camiñando cara á evolución do usuario dixital ao cidadán dixital.

Na presentación do informe, emitida en streaming e dispoñible na rede, interviñeron D. Francisco Polo, secretario de Estado para o avance dixital do Ministerio de Economía e Empresa, e D. Valeriano Gómez Sánchez, exministro de Traballo e Inmigración.

MÁIS NOVAS
Aberto o prazo de inscrición para Novas olladas á costa galega (2ª ed.)
Este obradoiro de fotografía documental co Colectivo Ollo terá lugar os vindeiros 6 e 7 de xullo en Noia
15/05/2024

Os vindeiros 6 e 7 de xullo na Sociedade Liceo de Noia (Noia) e baixo a dirección de Mª Soliña Barreiro González e Jennifer Novoa Domínguez, terá lugar a 2ª edición deste obradoiro de fotografía documental organizado polo Grupo de Estudos Audiovisuais e o colectivo fotográfico Ollo. Constará de 16 horas lectivas cun límite de asistencia de 25 persoas. […]

Seguir lendo
Margarita Ledo Andión participa nas xornadas “50 anos do 25 de abril”
A Catedrática emérita do GEA estará presente no coloquio: "O 25 de abril do outro lado do Miño" na Facultade de Filoloxía da USC
12/04/2024

A Revolución dos Caraveis, o levantamento militar do 25 de abril de 1974 en Portugal, denominado en portugués Revolução dos Cravos, derrubou nun día o réxime político ditatorial que existía no país veciño desde 1926. As cinco xornadas que compoñen o programa das xornadas que conmemoran os 50 anos deste feito histórico, desenvolveranse desde o […]

Seguir lendo
30 aniversario da AGAPI
A segunda xornada terá lugar o mércores 17 de abril na Facultade de Ciencias da Comunicación da USC
12/04/2024

Neste 2024 AGAPI celebra o seu 30 aniversario e unha das accións que vai levar adiante é a celebración dunhas xornadas formativas itinerantes polas tres universidades galegas nas facultades de Ciencias da Información dentro do Grao de Comunicación Audiovisual da Universidade de Santiago de Compostela (USC), Universidade de Vigo (UVIgo) e Universidade da Coruña (UDC). […]

Seguir lendo
© 2024 Estudos Audiovisuais