Desde o 29 de marzo a serie O sabor das Margaridas pode atoparse no catálogo de Netflix, converténdose na primeira produción en galego desta plataforma dixital presente en máis de 180 países. A serie, coproducida por CTV, CRTVG e Comarex, recibiu o Mestre Mateo á Mellor Serie de Televisión, tras ser estreada o pasado outubro na TVG con grande éxito. Agora, xa pode verse en versión orixinal subtitulada a través de Netflix, traducida como Bitter Daisies.
O pasado 9 de maio Netflix UK & Ireland revelaba desde a súa conta de twitter oficial a clasificación das series en fala non inglesa máis vistas no mes de abril, entre as que se atopa, no posto 7, O sabor das margaridas. O director de proxectos de CTV e guionista da serie, Ghaleb Jaber Martínez, recibe este éxito como un premio ao esforzo de todo o equipo, destacando que “por temática y tratamiento sabíamos que tenía todos los ingredientes para viajar”.
“O sabor das margaridas” é un thriller policial de seis episodios escrito por Ghaleb Jaber Martínez, Eligio Montero e Raquel Arias. Con dirección de Miguel Conde e protagonizada por María Mera, a serie conta entre o seu elenco con actores como Tony Salgado, Miguel Ínsua ou Nerea Barros.