Nace o MOCA, o primeiro museo virtual adicado ao cinema autobiográfico

Da colaboración entre La Cinematográfica, unha organización viguesa para a xestión cultural do cinema, e a empresa Café Candelas, nace o MOCA, o primeiro Museo Online de Cine Autobiográfico. O seu obxectivo é “por en valor o cinema como medio para contar historias persoais e o celuloide como soporte atemporal no que gardar as lembranzas dos momentos máis íntimos como algo verdadeiramente especial e singular, en tempos nos que a imaxe ne primeira persoa ocupa todo o espectro dixital e as redes sociais”.

Dirixido por Pablo Gómez Sala e con Xisela Franco como comisaria inaugural, o MOCA abre as súas portas coa exhibición Toronto en primeira persoa, unha mostra de vinte películas de cineastas con vínculos coa comunidade de Toronto, que relatan en primeira persoa historias sobre a identidade, a memoria, ou a viaxe e que se enceta coa obra do director canadiano Rick Hancox. 

Alén das Mostras de Cinema Autobiográfico, de periodicidade anual, o proxecto artéllase arredor doutras tres actividades centrais: a colección de cinema doméstica, a convocatoria anual de dúas bolsas de produción de obras cinematográfica autobiográfica e a organización de xornadas para a reflexión deste fenómeno artístico.