Investigadores do GEA presentes nun coloquio sobre América Latina, decolonialidade e interculturalidade

Os investigadores do Grupo de Estudos Audiovisuais (GEA) da Universidade de Santiago de Compostela participaron no II Coloquio Internacional Repensar a América Latina – Decolonialidade, Interculturalidade e Novas Subxectividades, celebrado en Braga (Portugal), entre o 24 e o 27 de febreiro. O evento foi organizado pola Universidade Federal de Alagoas (UFAL, Brasil) e o Centro de Estudos de Comunicação e Sociedade da Universidade do Minho (Portugal), en cooperación coa Asociación de Filosofía y Liberación (AFYL), o Centro de Estudos Ibéricos e Iberoamericanos (CEIIBA) e o Laboratorio de Estudos do Discurso (LED). O coloquio celebrouse en formato híbrido, con sesións presenciais e en liña, o que facilitou a participación internacional.

No evento presentouse a comunicación «Análise de prácticas decoloniais en tecnoloxías inmersivas: un estudo de casos en Latinoamérica» por Rocío Sosa Fernández, Enrique Castelló Mayo e Roi Méndez Fernández. Así mesmo, o investigador visitante do GEA Natalício Batista, procedente da Universidade Federal de Alagoas, participou nunha mesa redonda no panel titulado «Imagem como ferida colonial: notas sobre raça e gênero». Natalício Batista presentou unhas observacións sobre a práctica de facer retratos fotográficos de persoas afrodescendentes escravizadas no Brasil a finais do século XIX e principios do XX, e explicou a contribución da fotografía á construción de patróns e estereotipos étnico-raciais e de xénero no Brasil.

O II Coloquio Internacional Repensar a América Latina foi un espazo de escoita e produción crítica de coñecementos e saberes que reuniu a investigadoras e investigadores, estudantes e activistas de diversas xeografías, nacións e idiomas interesados nos desafíos contemporáneos do Sur global e os diálogos estratéxicos con outros continentes. O Coloquio reafirmou o seu compromiso co pensamento crítico e a descolonización dos saberes, das prácticas e das institucións, e considerou outras formas de convivencia, coñecemento e xustiza.