O luns 12 de novembro a Facultade de Ciencias da Comunicación da Universidade de Santiago de Compostela acollerá a primeira sesión do CO(M)XÉNERO, o Seminario Permanente de Comunicación e Xénero que organiza o Grupo de Estudos Audiovisuais (GEA) .
Dirixido por Margarita Ledo Andión, Catedrática de Ciencias de Comunicación e Publicidade da USC e coordinadora do GEA, o seminario CO(M)XÉNERO busca ser un foco permanente de discusión e formación sobre o papel dos medios na vertebración da sociedade, con especial atención á visibilización informativa e cinematográfica da(s) identidade(s) de xénero. Nesta andadura conta coa colaboración da Xunta de Galicia, a Oficina de Igualdade de Xénero da USC, o programa Territorio das Mulleres, a Asociación Xornalistas Galegas e o Colexio de Xornalistas.
Esta primeira sesión do CO(M)XÉNERO arranca as 16.00 horas no Auditorio da Facultade de Ciencias da Comunicación. Logo da benvida ás persoas asistentes e a presentación do seminario a cargo de Margarita Ledo Andión, intervirá Ana Jorge Alonso, profesora da Universidade de Málaga (UMA). Doutora en Ciencias da Comunicación pola UMA e cunha ampla traxectoria investigadora en comunicación para o cambio social e o desenvolvemento, especialmente centrada nos Estudos da Muller, Ana Jorge presentará a ponencia “Xénero e poder. A construción do discurso e o espazo mediático”.
A seguir, tomará a palabra a investigadora Carla Cerqueira, doutora en Ciencias da Comunicación con especialización en Psicoloxía da Comunicación pola Universidade do Minho. Bolseira posdoutoral no Centro de Estudos de Comunicação e Socidade (CECS-Universidade do Minho) e profesora auxiliar na Universidade do Porto, Carla Cerqueira centra a súa investigación nas relacións entre o xénero os medios, as desigualdades sociais e a comunicación no marco das ONG’s. A súa intervención no seminario leva por título “Xénero e xornalismo. Representacións e (in)visibilidades. Pautas para un tratamento informativo libre de tópicos sexistas”.
A terceira das relatoras convidadas do CO(M)XÉNERO é Marta Pérez Pereiro, doutora en Ciencias da Comunicación pola Universidade de Santiago de Compostela e membro do Grupo de Estudos Audiovisuais. Esta investigadora, que centra a súa carreira na análise da ficción televisiva e cinematográfica e os estudos sobre o humor, analizará o papel dos textos, filmes e iniciativas asinadas por mulleres no discurso cinematográfico coa intervención “Xénero e cinema. A crítica feminista na construción da ollada”.
O seminario pecha coa proxección do filme Tódalas mulleres que coñezo, da realizadora Xiana do Teixeiro. Doutora de Comunicación Audiovisual pola Universitat Autónoma de Barcelona e estudante egresada da Facultade de Ciencias da Comunicación da USC, Xiana do Teixeiro dirixe, guioniza e produce este filme que conversa sobre a desigualdade social de homes e mulleres e ten a cidade de Lugo como pano de fondo. Ao remate da proxección, relatoras e participantes manterán un debate aberto sobre a película.
O seminario CO(M)XÉNERO está dirixido a profesionais, estudantes de comunicación e a todas as persoas interesadas en facerse con ferramentas para unha lectura crítica dos mesmos. A participación é de balde previa inscrición a través do formulario dispoñible na web www.estudosaudiovisuais.gal.
Para máis información: info@estudosaudiovisuais.gal
Os días 10 e 11 de novembro a Facultade de Comunicación acollerá a decimoterceira edición do seminario CO(M)xénero, este ano titulada “Erro inesperado. Artesás e sintéticas contra as violencias na imaxe pública”. A inscrición xa está aberta, a participación é de balde ate completar aforo e a asistencia ó seminario é unha actividade recoñecida para […]
A aprobación da Lei Xeral do Audiovisual en 2022 actualizou o marco normativo español en materia audiovisual, abordando algúns dos retos presentados por axentes como as plataformas de streaming pero deixando abertos algúns outros no relativo á protección da diversidade. O proxecto LEXCAV, financiado polo Programa Estatal de I+D+i Orientada a los Retos de la Sociedad e desenvolvido polo Grupo Estudos Audiovisuais, ten realizado nos […]
O Teatro Colón da Coruña foi o escenario este venres da V Gala da Cultura, unha cita na que a Deputación da Coruña reuniu 19 persoas premiadas en 13 categorías. O evento, presentado pola xornalista Susana Pedreira e o actor e músico Xoán Fórneas, contou coa actuación de Caamaño & Ameixeira e cunha destacada presenza […]