CO(M)XÉNERO VIII. Videoensaio: cinema menor?

Os cinemas do eu e dende o eu, o cine proceso como fórmula reflexiva, o cine ensaio como método de pensar o mundo a través das imaxes e como método para deixar que as imaxes recuperen o seu peso serán as prácticas que abordaremos nesta oitava edición do CO(M)XÉNERO, organizada polo Grupo de Estudos Audiovisuais (GEA).  

“Videoensaio: cinema menor?” interróganos sobre a liberdade e heteroxeneidade desta práctica vencellada ao cinema feminista dende as súas orixes. E xoga cas reflexións de Deleuze e Guattari en Kafka. Pour une littérature mineur para considerar este tipo de ensaio coa cámara como cine político e con arume  colectivo, como cine que constrúe espazos de emancipación.

Ana Mejón achegaranos a experiencia da revista Tecmerin, destacada por Sight and Sound polos seus contidos desenvolvidos a través de videoensaios, e Xisela Franco proporá, dende a súa propia praxe, técnicas de traballo para ensaiar cos xéneros do eu.  

A inscrición é de balde e está aberta ata o 5 de marzo a través deste formulario.