CO(M)XÉNERO 5. Recuperar a fala, recuperar a alma

A persistencia do discurso androcéntrico nos contidos, a liña editorial e as estruturas organizacionais dos medios de comunicación actuais e das industrias creativas e culturais reflicten e perpetúan unha sociedade asimétrica e disfuncional que silencia e incapacita os posicionamentos diverxentes.

Pór fin a esta dinámica invalidante pasa pola necesaria construción de audiencias e colectividades formadas no pensamento crítico, capaces de analizar, deconstruír e mesmo comezar a reverter as representacións e estruturas sexistas presentes nos medios.

A quinta edición do CO(M)XÉNERO, organizada polo Grupo de Estudos Audiovisuais (GEA) e a Oficina de Igualdade de Xénero da USC co apoio de Xornalistas Galegas, pon o foco na violencia sufrida por mulleres e nas diversas prácticas de resistencia e autodefensa artelladas dende eidos tan diversos como a recuperación da lingua propia, a recuperación de espazos e obxectos ou mesmo dende a asunción da violencia como lexítima forma de defensa. O seminario afondará en discursos históricos, audiovisuais e antropolóxicos á vez que proporá a creación de pezas audiovisuais que reforcen a idea da recuperación da fala como recuperación do discurso, da alma propia.

O seminario está dirixido a estudantes de comunicación, persoal investigador, profesionais e, en xeral, a todas as persoas interesadas en abordar, dende unha lectura crítica, os medios e as industrias culturais e creativas.

O prazo de inscrición está aberto até o 9 de novembro.

Esta edición do CO(M)XÉNERO conta con fondos do Pacto de Estado contra a Violencia de Xénero (Ministerio da Presidencia, Relacións coas Cortes e Igualdade) e da Xunta de Galicia a través da convocatoria 2021 de axudas para a consolidación e estruturación de unidades de investigación competitivas, da que é beneficiario o GEA.

A participación é de balde previa inscrición. Prazas esgotadas.

Programa

Mércores, 10 de novembro. 

VISIONADO 1.

(Podes seguilo en liña en TEAMS)

16.15 h | Benvida e presentación do V CO(M)XÉNERO. | Margarita Ledo Andión, catedrática de Comunicación Audiovisual e Publicidade da Universidade de Santiago de Compostela,  Marta Pérez Pereiro, docente e investigadora da Universidade de Santiago de Compostela, María Soliña Barreiro González, docente e investigadora da USC, e Silvia Roca Baamonde, xornalista e investigadora da USC.

16.30 h | Nós, que vimos de fora. A fala na diáspora coma experiencia queer

Relatora: Brigitte Vasallo. Investigadora e escritora

17.30 h | Proxeccións e debate: Una dedicatoria a lo bestia (Dirs. nucbeade, 10´45’’), coa participación de Quiela Nuc e Andrea Beade.

Modera: Margarita Ledo Andión

18.30 h | Pausa

SALA NACHO MIRÁS

18.45 h| Peza de aprendizaxe: Obradoiro arredor do proxecto No nos veréis llorar.
Docentes: Elena G. Fraj Herranz, investigadora e docente da Universitat de Barcelona e cineasta,  e Miguel Ángel Ramos, deseñador gráfico, ilustrador e realizador audiovisual.

21.00 h | Peche

Xoves, 11 de novembro

VISIONADO 1.

(Podes seguilo en liña en TEAMS)

16.15 h | Benvida e presentación

16.30 h | Representación das mulleres no cinema dos orixes: das traballadoras, emigrantes e prostituídas ás revolucionarias, terroristas e sufraxistas.

Relatora: Mª Soliña Barreiro , investigadora e docente da Universidade de Santiago de Compostela.

17:30 h | Quen eran en realidade as bruxas? Unha aproximación dende a antropoloxía feminista.

Relatora: Guadalupe Jiménez Esquinas, docente e investigadora da USC, e Rosalía Quiroga, graduada da Universidade de Santiago de Compostela.

18.30 h | Pausa

SALA NACHO MIRÁS

18.45 h | Peza de aprendizaxe: Obradoiro arredor do proxecto No nos veréis llorar.

Docentes: Elena G. Fraj Herranz, investigadora e docente da Universitat de Barcelona e cineasta,  e Miguel Ángel Ramos, deseñador gráfico, ilustrador e realizador audiovisual.

21.00 h | Peche

Recoñecemento para estudantes de Doutoramento en Comunicación e Información Contemporáneas.

A participación no seminario pode ser recoñecida como actividade formativa para o estudantado do Programa de Doutoramento en Comunicación e Información Contemporáneas. Esixe acreditación da asistencia á totalidade das actividades recollidas nun dos itinerarios.

Solicita máis información en comxenero@estudosaudiovisuais.gal