Variantes na mundialización: Galiza na Lusocom

Como adoito acontece na historia, a idea precedeu á súa posta en práctica; a necesidade creou un certo estado de conciencia; o pensamento encol da diversidade e a política europea da excepcionalidade cultural, que nós aplicamos ao eido da cinematografía e do audiovisual, permitiunos levar o debate para un novo escenario, e todo vai alentando a crenza de que estamos no momento acaído para entrar con bo pé no ensaio xeral. O camiño, máis ou menos tortuoso e demorado, comezaba a debuxarse hai cinco anos e continuará gañando en detalles con máis iniciativas.