Margarita Ledo, coordinadora do Grupo de Estudos Audiovisuais, vén de participar no XV Festival de Documentales Santiago Alvarez In Memoriam celebrado entre o 6 e o 11 de marzo en Santiago de Cuba. Alí, Ledo presentou a súa disertación “En torno a lo viejo y lo nuevo en el documental contemporáneo”, ademais de presidir o xurado da competencia principal xunto a Saudi Batalla (México) e Miriam Talavera (Cuba).
Na súa conferencia, Ledo sinalou que “non foi un cine de montaxe, con materiais moi á man, recuperación de arquivos e resignificación de fotos de prensa, iso estase facendo actualmente dunha maneira expansiva. Con Hanoi, Santiago Álvarez organizou o cotiá coa quebra, que é a guerra, precisamente ese tipo de conflito é algo que define ao documental contemporáneo”. Asemade, avogou por recuperar a memoria do xénero documental e ir creando a propia tradición desa forma de expresión audiovisual.