O GEA participa na rodaxe do documental do proxecto europeo EduCO2health en Romanía

Os investigadores do Grupo de Estudos Audiovisuais (GEA) Pablo Calviño Tato e Manuel Barreiro Rozados participan nunha mobilidade en Romanía para a gravación do documental do proxecto europeo EduCO2health, financiado pola Unión Europea e orientado ao estudo do exposoma humano e a analizar como os impactos ambientais nas pradeiras mariñas dos océanos europeos poden influír na saúde.

O proxecto, cuxo investigador principal é o doutor Ángel Carracedo, conta coa colaboración de socios de varios países europeos: os Museos Científicos Coruñeses (Concello da Coruña), o IES Bernardino de Escalante de Laredo (Cantabria), a Universidade de Aveiro a través do seu centro de divulgación Fábrica Centro Ciencia Viva (Portugal), a Universidade Alexandru Ioan Cuza de Iași (Romanía) e o Liceo XXVI de Łódź (Polonia). A rodaxe en Romanía, iniciada o 30 de marzo, incluíu localizacións no delta do Danubio, a Estación de Bioloxía Mariña da Universidade de Iași e as praias de Eforie Sud. O documental estrearase o 30 de xuño en Noia, no marco do curso de verán Xenes, Ambiente, Saúde e Cinema, no que tamén colabora o Grupo de Estudos Audiovisuais (GEA).