Actualidade
Novas e Axenda Bota un ollo á actividade do GEA

“Cine, diversidade e redes” preséntase no Congreso AE-IC 2012 de Tarragona: comunicación e risco

11/01/2012

Tras máis de dous anos de proceso investigador, o proxecto de pesquisa “Cine, diversidade e redes”, coordinado polo Grupo de Estudos Audiovisuais e dirixido pola catedrática Margarita Ledo, aproxímase á fase de conclusións. A primeira achega terá lugar o vindeiro 19 de xaneiro en Tarragona, dentro do III Congreso da AE-IC “Comunicación e risco”.

O proxecto de investigación “Cine, diversidade e redes” comeza a deitar conclusións definitivas en publicacións e congresos internacionais. No III Congreso da Asociación Española de Investigación da Comunicación (AE-IC), “Comunicación e risco”, o grupo de Estudos Audiovisuais promove e coordina o panel titulada “A circulación de produtos do cine galego”, no que participarán os doutores Enrique Castelló, Óscar Traversa e Martín Becerra. A mesa será moderada pola doutora Ana Isabel Rodríguez e terá lugar o xoves 19 de xaneiro de 2012 ás 15.00 horas na aula 313 da Facultade de Letras da Universitat Rovira i Virgili de Tarragona.

O panel que servirá de presentación oficial dos resultados da investigación iniciarase cunha presentación conceptual do proxecto e da ferramente online da pesquisa a cargo da moderadora e membro do Grupo de Estudos Audiovisuais, Ana Isabel Rodríguez. A seguir o doutor Enrique Castelló ofrecerá o relatorio principal do panel baixo o título “Cine, diversidade e redes. Estratexias para a circulación do cine galego”, no que se debullarán os resultados finais do proceso investigador. Para completar a mesa intervirán os doutores da Arxentina Martín Becerra, coordinador do grupo de recepción da Universidade Nacional de Quilmes, co relatorio “Cine, diversidade e redes con ancoraxe na Arxentina”; e, por outra banda, o doutor Óscar Traversa e o profesor Nicolás Bermúdez,coordinadores do grupo de recepción do Instituto Nacional das Artes da Arxentina, co relatorio “Arredor do risco e os seus paradoxais atenuantes comunicacionais: o caso dos galegos na Arxentina”.

A pesquisa do Grupo de Estudos Audiovisuais, “Cine, diversidade e redes”, botou a andar a finais de 2009 como un proxecto de investigación online, emprendido coa finalidade de coñecer e analizar a recepción de produtos cinematográficos galegos naqueles estados de América onde existen comunidades emigrantes con dereito a voto; nomeadamente Arxentina, Brasil e Uruguai. Logo dun intenso período de preparación metodolóxica e de capacitación tecnolóxica dos grupos de recepción sitos en Latinoamérica, a inicios de 2011 iniciouse o proceso de análise en liña de produtos do cinema galego en centros de estudos –Pontificia Universidade Católica do Rio Grande do Sul (PUCRS), Instituto Universitario Nacional da Arte de Bos Aires (IUNA), Universidade Nacional de Quilmes (UNQ), Universidade da República de Uruguai (UDELAR)-, e da emigración galega no alenmar -Patronato da Cultura Galega de Uruguai e Federación de Asociacións Galegas da República Arxentina-.

MÁIS NOVAS
Arranca o Seminario Permanente CO(M)XÉNERO na USC
07/11/2018

O luns 12 de novembro a Facultade de Ciencias da Comunicación da Universidade de Santiago de Compostela acollerá a primeira sesión do CO(M)XÉNERO, o Seminario Permanente de Comunicación e Xénero que organiza o Grupo de Estudos Audiovisuais (GEA) . Dirixido por Margarita Ledo Andión, Catedrática de Ciencias de Comunicación e Publicidade da USC e coordinadora […]

Seguir lendo
As tecnoloxías da lingua, unha oportunidade para a sociedade galega
Xornadas do CDG
16/10/2018

O Consello da Cultura Galega organiza estas xornadas que exploran as aplicacións tecnolóxicas relacionadas coa lingua para analizar a presenza do galego na contorna dixital. Nelas participa Pablo Romero Fresco, un dos investigadores do proxecto EUVOS. Patrimonio Cultural Inmaterial. Para un programa europeo de subtitulado en linguas non hexemónicas (AEI, ref. CSO2016-76014-R), á súa vez director […]

Seguir lendo
Margarita Ledo, Xaime Fandiño e Brais Romero participan nas “Mesas interxeracionais do audiovisual galego” en Curtocircuíto
Do 4 ao 5 de outubro en Santiago de Compostela
28/09/2018

Tres integrantes do Grupo de Estudos Audiovisuais tomarán parte nas Mesas interxeracionais do audiovisual galego: xornadas construtivas para destruír tópicos, mitos e prexuízos do noso sector’, un conxunto de relatorios e debates que este ano ofrece o XV Festival Internacional de Cine- Curtocircuíto para atopar puntos en común entre os diferentes profesionais e os seus xeitos […]

Seguir lendo
© 2018 Estudos Audiovisuais