Actualidade
Novas e Axenda Bota un ollo á actividade do GEA

Oliver Laxe gaña con “Mimosas” a Semana da Crítica de Cannes

20/05/2016

O cineasta galego Oliver Laxe vén de gañar o Gran Premio da Semana da Crítica do Festival de Cannes co seu filme Mimosas. O xurado, presidido por Valérie Donzelli, outorgoulle un recoñecemento que noutras edicións recibiron directores como Bernardo Bertolucci, Leos Carax ou Wong Kar Wai. Deste xeito, Laxe recibe por segunda vez o favor do festival cinematográfico máis prestixioso, logo de que Todos vós sodes capitáns, a súa primeira longametraxe, gañara o premio FIPRESCI en 2010 e abrira a etapa de éxito internacional do Novo Cinema Galego.

Laxe definiu Mimosas como “un western relixioso”, e nela nárrase a travesía emprendida por tres personaxes que queren dar sepultura ao corpo dun mestre sufí. Para chegar a Sijilmasa, cidade bereber en ruinas, deben superar numerosas trabas e cruzar as montañas do Atlas. A relixión musulmana é retratada na película dunha maneira respetuosa, nunha obra que traballa sobre a fé procurando a universalidade. En declaracións a El País, Laxe explicábase: “Facer unha película non é un acto de onanismo: teño unha responsabilidade co espectador. E, á vez, sei que a mellor maneira de comunicar é deixar unha porta aberta á estupefacción e á sombra.” As paisaxes duras e áridas de Marrocos, onde o director reside parte do ano, cobran tamén grande importancia no filme, que pasou por un longo proceso de traballo antes de acadar a súa forma final.

Mimosas está coproducido pola produtora galega Zeitun Films coa marroquí La Prod e a francesa Rouge International. A estrea comercial do filme en Francia (a través de UFO Distribution) está prevista para outono deste ano, pero aínda non hai data para a súa chegada a Galicia e o resto do Estado.

MÁIS NOVAS
As tecnoloxías da lingua, unha oportunidade para a sociedade galega
Xornadas do CDG
16/10/2018

O Consello da Cultura Galega organiza estas xornadas que exploran as aplicacións tecnolóxicas relacionadas coa lingua para analizar a presenza do galego na contorna dixital. Nelas participa Pablo Romero Fresco, un dos investigadores do proxecto EUVOS. Patrimonio Cultural Inmaterial. Para un programa europeo de subtitulado en linguas non hexemónicas (AEI, ref. CSO2016-76014-R), á súa vez director […]

Seguir lendo
Margarita Ledo, Xaime Fandiño e Brais Romero participan nas “Mesas interxeracionais do audiovisual galego” en Curtocircuíto
Do 4 ao 5 de outubro en Santiago de Compostela
28/09/2018

Tres integrantes do Grupo de Estudos Audiovisuais tomarán parte nas Mesas interxeracionais do audiovisual galego: xornadas construtivas para destruír tópicos, mitos e prexuízos do noso sector’, un conxunto de relatorios e debates que este ano ofrece o XV Festival Internacional de Cine- Curtocircuíto para atopar puntos en común entre os diferentes profesionais e os seus xeitos […]

Seguir lendo
Preséntase os resultados do proxecto “Cara a unha gobernanza participativa do patrimonio cultural material e inmaterial na cidade de Santiago de Compostela”.
Trátase dunha iniciativa de Aprendizaxe-Servizo, na que o alumnado se converte en voluntario con capacidade para mellorar unha necesidade social da súa contorna
25/09/2018

Un podcast cultural sobre os cafés teatro de Compostela, un mapa sonoro da cidade, un percorrido fotográfico polos barrios ou pequenas pezas audiovisuais son algúns dos resultados do proxecto de innovación educativa ‘Cara a unha gobernanza participativa do patrimonio cultural material e inmaterial na cidade de Santiago de Compostela’ que este mércores se presentarán na […]

Seguir lendo
© 2018 Estudos Audiovisuais