Actualidade
Novas e Axenda Bota un ollo á actividade do GEA

“Culturas de resistencia, pobos e idiomas minorizados”, Call for papers do CEMTI da Universidade París 8 Vincennes

19/05/2016

O Centro de Estudos sobre Medios, Tecnoloxías e Internacionalización da Universidade Paris 8 Vincennes vén de abrir o call for papers para a conferencia internacional “Culturas de resistencia, pobos e idiomas minorizados”, que terá lugar o 1 e 2 de decembro de 2016 no museo de arte da Halle Saint Pierre. O 15 de agosto de 2016 é a data límite para enviar propostas de comunicación arredor do obxectivo da conferencia, que é “debatir a maneira coa cal os Estados, dentro do seu propio territorio, tratan as linguas e as culturas minorizadas, así como os modos de resistencia despregados por estes pobos para defender os seus dereitos”.

Xa que logo, prestarase no encontro especial atención á maneira na que os grupos minorizados articulan culturalmente as súas reivindicacións, arredor da idea dunha cultura de resistencia forxada a través de loitas conducidas por pobos que lograron sobrevivir e transmitir o seu idioma onde outros desapareceron. Dende o comité científico da conferencia, do que forma parte Margarita Ledo Andión (Catedrática da Universidade de Santiago de Compostela e coordinadora do Grupo de Estudos Audiovisuais), formúlanse unha serie de preguntas para orientar as propostas: “Que relacións manteñen as formas de resistencia cos valores que levan os pobos? Como interactuaron as tensións históricas vinculadas pola creación dos estados-nación ou dos imperios coloniais coa busca de recoñecemento, obrigando aos grupos minorizados a valerse da astucia contra as imposicións da cultura dominante? Que capacidade crítica teñen estes movementos sociais para pensar a cidadanía e o bo vivir na era da internacionalización dos sistemas de comunicación e das economías? En resumo, como se pode caracterizar a gama de accións colectivas mobilizadas polas minorías que entraron en resistencia en diferentes contextos históricos e socio-políticos?”

Estas cuestións serán postas a debate a través de catro eixos temáticos:

1. O marco político das reivindicacións no seu cuestionamento da esfera pública dos estados-nación.
2. O marco xurídico cos textos internacionais ou constitucionais que organizan a defensa e a promoción dos idiomas e culturas do mundo.
3. O marco económico para tratar as tensións entre dereitos territoriais/soberanía rexional e desenvolvemento económico.
4. O marco das mobilizacións militantes coas varias experimentacións e iniciativas.

As propostas deben enviarse, en castelán, francés ou inglés, a culturesresistance@univ-paris8.fr incluíndo un título, un resumo de 500 palabras e unha biografía breve. No caso de ser aceptados, os traballos completos deberán ser enviados por vía electrónica á sede do Comité Organizador antes do 15 de novembro de 2016. Para máis información, pode descargarse aquí o pdf da convocatoria (en castelán) ou contactar co profesor Jacques Guyot (jacques.guyot@univ-paris8.fr).

MÁIS NOVAS
As tecnoloxías da lingua, unha oportunidade para a sociedade galega
Xornadas do CDG
16/10/2018

O Consello da Cultura Galega organiza estas xornadas que exploran as aplicacións tecnolóxicas relacionadas coa lingua para analizar a presenza do galego na contorna dixital. Nelas participa Pablo Romero Fresco, un dos investigadores do proxecto EUVOS. Patrimonio Cultural Inmaterial. Para un programa europeo de subtitulado en linguas non hexemónicas (AEI, ref. CSO2016-76014-R), á súa vez director […]

Seguir lendo
Margarita Ledo, Xaime Fandiño e Brais Romero participan nas “Mesas interxeracionais do audiovisual galego” en Curtocircuíto
Do 4 ao 5 de outubro en Santiago de Compostela
28/09/2018

Tres integrantes do Grupo de Estudos Audiovisuais tomarán parte nas Mesas interxeracionais do audiovisual galego: xornadas construtivas para destruír tópicos, mitos e prexuízos do noso sector’, un conxunto de relatorios e debates que este ano ofrece o XV Festival Internacional de Cine- Curtocircuíto para atopar puntos en común entre os diferentes profesionais e os seus xeitos […]

Seguir lendo
Preséntase os resultados do proxecto “Cara a unha gobernanza participativa do patrimonio cultural material e inmaterial na cidade de Santiago de Compostela”.
Trátase dunha iniciativa de Aprendizaxe-Servizo, na que o alumnado se converte en voluntario con capacidade para mellorar unha necesidade social da súa contorna
25/09/2018

Un podcast cultural sobre os cafés teatro de Compostela, un mapa sonoro da cidade, un percorrido fotográfico polos barrios ou pequenas pezas audiovisuais son algúns dos resultados do proxecto de innovación educativa ‘Cara a unha gobernanza participativa do patrimonio cultural material e inmaterial na cidade de Santiago de Compostela’ que este mércores se presentarán na […]

Seguir lendo
© 2018 Estudos Audiovisuais